ہاکی ورلڈ کپ: انڈیا نے پاکستان کو شکست دے کر ایونٹ سے باہر کر دیا

بیلجیم اور نیدرلینڈز میں مشترکہ طور پر جاری فیڈریشن آف انٹرنیشنل ہاکی کے زیر انتظام ہاکی ورلڈ کپ کے اہم میچ میں انڈیا نے پاکستان کو سنسنی خیز مقابلے میں تین کے مقابلے میں 5 گول سے شکست دے کر ہاکی ورلڈ کپ سے باہر کر دیا ہے۔

بدھ کو نیدر لینڈز کے ویگنور ہاکی سٹیڈیم میں انڈیا نے پہلے کوارٹر میں دو گولز کے ساتھ برتری حاصل کر لی، تاہم پاکستان نے دوسرے کوارٹر میں گول کر کے مقابلے میں واپسی کی کوشش کی۔

یاد رہے کہ روایتی حریف پاکستان اور انڈیا تقریبا 16 برس بعد آمنے سامنے تھے۔

دونوں روایتی حریفوں کے درمیان مقابلہ سنسنی خیز رہا، تاہم انڈیا نے مجموعی طور پر پانچ گولز کر کے پاکستان کو تین کے مقابلے میں پانچ گولز سے شکست دے دی۔

اس شکست کے بعد پاکستان کا ہاکی ورلڈ کپ میں سفر اختتام پذیر ہو گیا ہے۔

فیڈریشن آف انٹرنیشنل ہاکی کے زیر انتظام ورلڈ کپ کا آغاز 15 اگست کو ہوا تھا جبکہ ایونٹ 30 اگست تک جاری رہے گا۔

پاکستان نے ایونٹ میں اس سے قبل دو میچز کھیلے تھے، جن میں پہلے میچ میں اسے انگلینڈ کے ہاتھوں شکست کا سامنا کرنا پڑا جبکہ ویلز کے خلاف میچ برابری پر ختم ہوا تھا۔

دوسری جانب انڈیا بھی اس سے قبل دو میچز کھیل چکا تھا۔ اسے انگلینڈ کے خلاف شکست ہوئی تھی، تاہم ویلز کے خلاف میچ میں اس نے کامیابی حاصل کی تھی۔

پاکستان اور انڈیا کی ہاکی رقابت

انٹرنیشنل ہاکی فیڈریشن کے مطابق پاکستان اور انڈیا کے درمیان اب تک 65 میچز کھیلے جا چکے ہیں، جن میں پاکستان نے 25 جبکہ انڈیا نے 31 میچز جیت رکھے ہیں اور نو مقابلے برابر رہے۔

دونوں ٹیموں کے درمیان پہلا میچ سنہ 1956 میں کھیلا گیا تھا۔

ہاکی پاکستان پاکستان کا قومی کھیل ہے اور وہ ہاکی کی تاریخ میں ایک شاندار اعزاز بھی رکھتا ہے، پاکستان چار مرتبہ عالمی چیمپیئن شپ اپنے نام کر چکا ہے۔ پاکستان کے علاوہ آسٹریلیا، جرمنی اور نیدرلینڈز نے تین، تین مرتبہ ہاکی ورلڈ کپ جیتا ہے۔

تاہم قومی کھیل میں پاکستان کے زوال کا اندازہ اس بات سے لگایا جا سکتا ہے کہ چار مرتبہ کے عالمی چیمپیئن پاکستان نے آٹھ سال بعد ہاکی ورلڈ کپ کے لیے کوالیفائی کیا تھا۔

دوسری جانب انڈیا اب تک صرف ایک مرتبہ ہاکی ورلڈ کپ جیت سکا ہے۔ انڈیا نے سنہ 1975 میں کوالالمپور میں منعقدہ مینز ہاکی ورلڈ کپ کے فائنل میں اپنے روایتی حریف پاکستان کو شکست دے کر پہلی اور اب تک کی واحد مرتبہ عالمی ٹائٹل اپنے نام کیا تھا۔

اس کے بعد انڈیا کسی بھی ہاکی ورلڈ کپ کے سیمی فائنل تک نہیں پہنچ سکا۔