’ٹنڈر ڈیٹنگ ایپ کی فلم سیریز بہت جلد نشر ہوگی‘

مشہور موبائل فون ایپ ’ٹنڈر‘ نے اپنی ایک فلمی سیریز منظر عام پر لانے کا عندیہ دیا ہے۔

ایپ کی مالک میچ گروپ کمپنی نے بین الاقوامی خبر رساں ادارے روئٹرز کو بتایا ہے کہ ٹی وی سیریز تمام مراحل سے گزر کر تیار ہو چکی ہے، البتہ سیریز کو نشر کرنے کے حوالے سے معلومات کو فی الحال راز میں رکھا گیا ہے۔

ٹنڈر ایپلیکیشن شریکِ حیات کو ڈھونڈنے کا جدید طریقہ ہے۔ عام الفاظ میں یہ ایک ڈیٹینگ ایپ ہے۔

اس کے لیے صرف ایک موبائل فون درکار ہے، جس پر ’ٹنڈر‘ ایپ ڈاؤن لوڈ کر کے ’ڈیٹنگ پارٹنرز‘ تلاش کیے جا سکتے ہیں۔

ٹنڈر کی انتظامیہ کا کہنا تھا کہ وہ کافی عرصے سے اپنا تخلیق شدہ کام نشر کرنا چاہتے تھے اور اس حوالے سے اہم فیصلے بھی کیے۔

تفصیلات کے مطابق اس سیریز کا تعلق ڈیٹنگ سے نہیں ہوگا بلکہ یہ سیریز قیامت یا دنیا کے ختم ہو جانے کے بارے میں ہوگی۔

مزید بتایا گیا ہے کہ یہ سیریز میکسیکو میں اگست کے مہینے میں فلمائی گئی ہے۔

میچ گروپ کے مشترکہ مالکان میں سے ایک بیرے ڈلیر ہیں جو انٹرایکٹیو گروپ (آئی اے سی) کے چیئرمین ہونے کے ساتھ ساتھ، ہالی وڈ میں خاصہ اثرو رسوخ بھی رکھتے ہیں۔

فلمی سیریز بنا کر ٹنڈر اپنے صارفین کے ساتھ ایک گہرا رشتہ قائم کرنا چاہتا ہے۔

واضح رہے کہ ٹنڈر کے صارفین بڑھنے کی وجہ سے اس کے شیئرز میں تقریباً 85 فیصد کا اضافہ ہوا ہے۔