سعودی عرب میں کورونا کے نئے کیسز پھر 50 سے زیادہ

سعودی عرب میں اتوار 10 اکتوبر کو  کورونا کے 50 سے زیادہ نئے کیسز سامنے آئے ہیں جبکہ فعال کیسز کی تعداد میں کمی آئی ہے۔ 

 اتوار کو سبق نیوز نے وزارت صحت کی جانب سے جاری بیان کے حوالے سے بتایا کہ ’گذشتہ 24 گھنٹوں کے دوران کورونا کے 59 نئے مریض سامنے آئے جبکہ 41 افراد صحت یاب بھی ہوئے ہیں۔‘

وزرات صحت کے مطابق ’گذشتہ 24 گھنٹے کے دوران کورونا کے مزید 2 مریض چل بسے، جس کے بعد مرنے والوں کی مجموعی تعداد بڑھ کر آٹھ  ہزار 745 ہو گئی ہے۔‘

وزارت کا کہنا ہے کہ ’مملکت میں کورونا کے فعال کیسز میں سے 139 مریضوں کی حالت نازک ہے جو انتہائی نگہداشت کے یونٹس میں زیرعلاج ہیں۔‘

اب تک پانچ لاکھ 47 ہزار 547 افراد میں کورونا وائرس کی تصدیق ہو چکی ہے، جن میں سے پانچ لاکھ 36 ہزار 626 افراد صحت یاب ہوچکے ہیں۔

وزارت صحت کا کہنا ہے کہ اب تک چار کروڑ 33 لاکھ 31 ہزار 327 کورونا ویکسین کی خوراکیں دی جا چکی ہیں۔