نمایاں خصوصیات کا حامل نیا سعودی ’ای پاسپورٹ‘ جاری

سعودی عرب نے نیا ’ای پاسپورٹ‘ جاری کر دیا ہے۔ عالمی معیار کے مطابق نمایاں خصوصیات کا حامل ہے۔

سعودی خبررساں ایجنسی ’ایس پی اے‘ کے مطابق وزیر داخلہ شہزادہ عبدالعزیز بن سعود نے جمعرات کو محکمہ پاسپورٹ ریاض کی عمارت میں نئے ای پاسپورٹ کا افتتاح کیا۔ 

اس موقع پر وزیر داخلہ نے کنٹرول اینڈ کمانڈ سینٹر، مشترکہ رابطہ مرکز 992 اور سروس سینٹر کے اہلکاروں سے بھی ملاقات کی۔

وزیر داخلہ کو سعودی شہریوں، مقیم غیرملکیوں اور وزٹ ویزوں پر آنے والوں کو تینوں سینٹرز کی جانب سے پیش کی جانے والی خدمات کے بارے میں بریفنگ دی گئی۔ انہیں اس موقع پر منفرد ای سروس فراہم کرنے والے آلات کا بھی تعارف پیش کیا گیا۔ 

وزیر داخلہ نے اس موقع پر وزارت داخلہ، وزارت خزانہ، سعودی ڈیٹا اینڈ آرٹیفشل انٹیلی جنس اتھارٹی کی مشترکہ کاوشوں سے نئے ای پاسپورٹ کے افتتاح کی دستاویز پر دستخط بھی کیے۔ 

نیے ای پاسپورٹ میں سم رکھی گئی ہے جس کی بدولت پاسپورٹ ہولڈر کا مکمل ڈیٹا سیکیورٹی سٹینڈرڈ مضبوط ہوگیا ہے۔  

نئے پاسپورٹ کی ایک خصوصیت یہ بھی ہے کہ بین الاقوامی ہوائی اڈوں، بندرگاہوں اور بری سرحدی چوکیوں پر ای گیٹ استعمال کرتے وقت مشینی ریڈنگ ممکن ہوگی۔

نئے سعودی پاسپورٹ کے صفحات کو مملکت کے مشہور ترین قابل دید تاریخی اور تمدنی مقامات سے مزین کیا گیا ہے۔ 

محکمہ پاسپورٹ کے ڈائریکٹر جنرل سلیمان الیحیی نے افتتاحی تقریب سے خطاب کرتے ہوئےکہا کہ اللہ  تعالی کے کرم، اعلی قیادت کی ہدایات و سرپرستی اور وزیر داخلہ شہزادہ عبدالعزیز کی مسلسل نگرانی کی بدولت حالیہ برسوں کے دوران محکمہ  پاسپورٹ نے بڑی اور اہم کامیابیاں حاصل کی ہیں۔ 

وزیر داخلہ کو اس موقع پر محکمہ پاسپورٹ کی ابتدا سے لے کر اب تک کی تاریخ پر مشتمل وڈیو دکھائی گئی جس میں اس کے اہم کارناموں اور مختلف اداروں سے ملنے والے ایوارڈز کا بھی تذکرہ شامل تھا۔