اقامہ اور ملازمت قوانین کی خلاف ورزی، غیرملکیوں اور شہریوں کے خلاف 17 ہزار 600 فیصلے

سعودی محکمہ پاسپورٹ نے انتظامی کمیٹیوں کے ذریعے ایک ماہ کے دوران (محرم 1447) اقامہ، ملازمت اور سرحدی امن قوانین کی خلاف ورزی پر 17 ہزار 600 فیصلے جاری کیے ہیں۔

اخبار24 کے مطابق بیان میں کہا گیا کہ ’سعودی شہریوں اور مقیم غیرملکیوں کو خلاف ورزیوں پر قید، جرمانے اور بے دخلی کی سزائیں دی گئی ہیں۔‘

محکمہ پاسپورٹ نے مقامی شہریوں اور مقیم غیرملکیوں پر زور دیا کہ ’وہ اقامہ، ملازمت اور سرحدی امن قوانین کی خلاف ورزی کرنے والوں کو ٹرانسپورٹ، روزگار، رہائش، پناہ، کسی بھی قسم کے تعاون یا ان کی پردہ پوشی سے گریز کریں۔‘

یاد رہے اقامہ قوانین کی خلاف ورزی کرنے والوں کو روزگار اور ٹرانسپورٹ کی سہولت فراہم کرنا قانون شکنی ہے جبکہ ایسے افراد جو غیرقانونی طورپر سرحد عبور کرکے مملکت میں داخل ہوتے ہیں ان کے ساتھ کسی بھی قسم کا تعاون کرنا سنگین خلاف ورزی میں شمار کیا جاتا ہے۔