سعودی عرب میں ایک ہفتے کے دوران 17 ہزار 863 غیر قانونی تارکین زیرحراست

سعودی عرب میں حکام نے ایک ہفتے کے دوران اقامہ، لیبر اور سرحدی خلاف ورزی پر مزید 17 ہزار 863 غیر قانونی تارکین کو گرفتار کیا ہے۔

 سرکاری خبر رساں ایجنسی ایس پی اے کے مطابق’ مجموعی طور پر 10 ہزار 746 افراد کو اقامہ قانون، 4 ہزار 326 کوغیرقانونی طور پر سرحد پار کرنے کی کوشش اور 2 ہزار755 تارکین کو قانون محنت کی خلاف ورزی پر پکڑا گیا ہے۔‘ 

’مملکت میں غیرقانونی طور پر داخل ہونے کی کوشش کرنے والے ایک ہزار507 افراد میں سے 33 فیصد یمنی، 65 فیصد ایتھوپین اور 2 فیصد دیگر ملکوں سے تعلق رکھتے ہیں۔

علاوہ ازیں 99 ایسے افراد کو بھی پکڑا گیا ہے جو ہمسایہ ملکوں میں داخل ہونے کی کوشش کررہے تھے۔

جبکہ اقامہ، ملازمت اور سرحدی امن قانون کی خلاف ورزی کرنے والوں کو سفر، رہائش، روزگار اور پناہ دینے کی کوششوں میں ملوث 26 افراد کو بھی حراست میں لیا گیا ہے۔ 

 سعودی عرب میں غیرقانونی تارکین وطن کو سفری، رہائشی یا ملازمت کی سہولت فراہم کرنا قانوناً جرم ہے اور اس کے لیے مختلف سخت سزائیں مقرر ہیں۔

 سعودی وزارت داخلہ کا کہنا ہے جو بھی شخص غیر قانونی تارکین کو سعودی عرب میں داخل ہونے کی سہولت فراہم کرے گا، اسے 15 برس قید اور 10 لاکھ  ریال تک جرمانے کی سزا ہوگی۔

 گاڑی اور رہائش کے لیے استعمال ہونے والی املاک کو بھی ضبط کیا جائے گا۔