یو ایس اوپن میں چیف ایگزیکٹو کا بچے سے ٹوپی چھیننے کا واقعہ، ٹینس سٹار کی فین سے ملاقات

امریکی شہر نیو یارک میں کھیلے گئے یو ایس ٹینس میچ کی ایک ویڈیو وائرل ہے جس میں دیکھا جا سکتا ہے کہ کھلاڑی کامل مائیشراک اپنی ٹوپی ایک ننھے فین کو دیتے ہیں لیکن ساتھ کھڑا آدمی چھین کر اپنے بیگ میں ڈال لیتا ہے۔

اس ویڈیو کے سامنے آنے کے بعد صارفین نے بھی کھل کر تبصرے کیے اور بچے کے ساتھ اس رویے پر ناپسندیدگی کا اظہار کیا۔

نیویارک پوسٹ کا کہنا ہے کہ بچے سے ٹوپی چھینے والے شخص کی شناخت ہو گئی ہے جو دراصل ایک کمپنی کے سربراہ ہیں جن کا نام پیوٹر شیزرک ہے۔  

سوشل میڈیا پر تنقید کے بعد پیوٹر شیزرک نے اپنے تمام اکاؤنٹس بند کر دے ہیں۔

یہ ویڈیو جب ٹینس سٹار تک پہنچی تو انہیں معلوم ہوا کہ اپنی کیپ جو انہوں نے بچے کو دی تھی وہ دراصل اس سے چھین لی گئی تھی۔

یو ایس اوپن ٹینس میچ سنیچر کو نیو یارک میں کھیلا گیا تھا جس میں پولینڈ کے کھلاڑی کامل مائیشراک نے روسی کھلاڑی کو شکست دی تھی۔

ویڈیو میں دیکھا جا سکتا ہے کہ جیت کے بعد کامل مائیشراک ٹینس کورٹ میں بیٹھے شائقین کے پاس جاتے ہیں اور آٹو گراف دیتے ہیں۔ اسی دوران انہوں نے شائقین میں موجود ایک بچے کو اپنی کیپ دے دی جو فوراً ہی ساتھ کھڑے ایک شخص نے بچے سے چھین لی۔

ویڈیو میں دیکھا جا سکتا ہے کہ بچہ ناراضگی کا اظہار کر رہا ہے اور بظاہراً اس شخص سے ٹوپی واپس لینے کا مطالبہ کرتا ہے۔

گزشتہ روز جب اس واقعے کی ویڈیو وائرل ہوئی تو ٹینس سٹار نے بھی افسوس کا اظہار کرتے ہوئے اپنے فینز سے اپیل کی کہ وہ بچے کی تلاش میں ان کی مدد کریں۔

کچھ دیر بعد انہوں نے ایک اور پوسٹ میں اپنے  فالوورز کا شکریہ ادا کیا اور بتایا کہ بچہ مل گیا ہے۔

سنیچر کو ہی کامل مائیشراک نے بچے سے ملاقات کی اور دیگر تحائف کے ساتھ اپنی بلیو رنگ کی ٹوپی بھی دی۔

انہوں نے انسٹاگرام سٹوری پر بچے کے ساتھ ملاقات کی ویڈیو بھی پوسٹ جس میں بچے نے ٹوپی پہن رکھی ہے۔