العلا: ڈرون شوز اور ثقافتی پروگرامز کے ساتھ قدیم سلطنتوں کا میلہ جاری

العلا میں قدیم سلطنتوں کا فیسٹیول جاری ہے جس میں موسم خزاں کی تعطیلات کے دوران ثقافتی وتاریخی واقعات کو نمایاں کرتے ہوئے مختلف نوعیت کی سرگرمیاں پیش کی جا رہی ہیں۔

سعودی پریس ایجنسی ایس پی اے کے مطابق سیاح تاریخی تجارتی راستوں سے متاثر سرگرمیوں سے لطف اندوز ہو رہے ہیں جو روایتی بازار کی کہانیوں کو ماضی کی خوشبوؤں اور ذائقوں کے ساتھ ملا کر العلا کی ثقافت کا ایک جاندار عکس پیش کرتی ہیں۔

روایتی قدیم بازار اور پرانے انداز کی گلیاں و محلے دکھائے گئے۔ ماضی کی خوشبو لیے روایتی پکوانوں کے سٹالز اس تجربے کو مزید پراثر بنا رہے تھے۔

قدیم سلطنتوں کے فییسٹول میں خاص بات یہ تھی کہ اس میں العلا کے مقامی لوگ بھی شریک تھے جن میں کہانی نویس، مختلف فنون کے ماہرین اور مورخین شامل تھے جو اپنی اپنی جگہ اس فیسٹیول میں رنگ بھر رہے تھے جس سے وزیٹرز کو ایسا محسوس ہوتا تھا کہ وہ حقیقت میں ماضی میں پہنچ چکے ہیں۔

اہم دلچسپ مقامات میں سعودی عرب کی پہلی یونیسکو عالمی ثقافتی ورثہ سائٹ ’حجر آفٹر ڈارک‘ بھی شامل ہے جس میں روشنیوں کے شوز اور پروجیکشنز کے ذریعے نباطیئن تہذیب کو دکھایا جاتا ہے۔

اس کے علاوہ ’سٹوریز فرام دی سکائی‘ ڈرون شو بھی ہے، جس میں سینکڑوں ڈرونز ایک شاندار مظاہرہ پیش کرتے ہیں۔

 مزید سرگرمیوں میں جبل عكمة میں قدیم نقش و نگار کی دریافت، اولڈ ٹاؤن میں مختلف سرگرمیاں، حجر کے ارضیاتی مقامات کے دورے اور بچوں کے لیے مخصوص ٹوئرز شامل ہیں جو ہر عمر کے فرد کے لیے معلوماتی اور دلچسپی کے مواقع فراہم کرتے ہیں۔