’ففٹی ہوگئی اب یہ ایکٹنگ کرے گا‘، محمد رضوان اور لٹن داس میں دوران میچ گرما گرمی

پاکستان اور بنگلہ دیش کے درمیان جاری ٹیسٹ میچ سے ایک ویڈیو سوشل میڈیا پر وائرل ہے جس میں پاکستانی بیٹر محمد رضوان اور بنگلہ دیش کے لٹن داس کے درمیان بظاہر سخت جملوں کا تبادلہ  ہو رہا ہے۔

اس ویڈیو میں دیکھا جا سکتا ہے کہ محمد رضوان بیٹنگ کے دوران ٹوکے جانے پر رُک کر وکٹ کیپر سے بات کرنے لگ جاتے ہیں۔

محمد رضوان کو بظاہر سائڈ سکرین کے بارے میں بات کرتے ہوئے سُنا جا سکتا ہے۔

محمد رضوان کو مخاطب کرتے ہوئے لٹن داس کہتے ہیں کہ ’کیا کر رہے ہو؟ جس کے جواب میں محمد رضوان کہتے ہیں ’دیکھ وہ دیکھ، وہ کھڑا ہے۔‘

اس کے بعد لٹن داس کہتے ہیں ’ادھر کیا دیکھ رہا ہے؟ ادھر بیٹنگ کر نا۔‘ اس کے ردعمل میں محمد رضوان کہتے ہیں ’یہ تیرا کام ہے، میرا اور امپائر کا کام ہے یہ۔‘

پھر لٹن داس محمد رضوان کے بارے میں کہتے ہیں کہ ’ففٹی ہوگئی، اب یہ ایکٹنگ شروع کرے گا۔‘ اس کے بعد کسی دوسری جانب سے بھی آواز آتی ہے ’اس کی اوور ایکٹنگ کے پچاس روپے کاٹیں گے۔‘

اس کے بعد امپائر مداخلت کرتے ہیں اور دونوں کھلاڑیوں کے درمیان تلخی کم کرتے ہیں۔

دونوں کھلاڑیوں کی گفتگو سوشل میڈیا پر خوب وائرل ہو رہی ہے اور صارفین اس پر دلچسپ تبصرے کر رہے ہیں۔

بھائی صاحب نامی اکاؤنٹ نے لکھا کہ ’بنگلہ دیش کے کھلاڑی رضوان کا مذاق اُڑا رہے ہیں۔‘

عبداللہ نے لکھا کہ ’لٹن داس اور محمد رضوان کے درمیان لفظی گولا باری۔‘

شیر علی نے ویڈیو شیئر کرتے ہوئے لکھا کہ ’ کھلاڑی نے کہا اس کے بعد اس کی ٹیم میں جگہ پکی ہے اس لیے اوور ایکٹنگ کر رہا ہے۔‘

ایک اکاؤنٹ نے لکھا کہ ’لٹن داس کو یہ سمجھنے کی ضرورت ہے کہ سلیجنگ اور بدتمیزی میں فرق ہوتا ہے۔ رضوان نے اسے مناسب جواب دیا۔‘

یاد رہے کہ پاکستان اور بنگلہ دیش کے درمیان جاری دوسرے ٹیسٹ میچ کے چوتھے روز پاکستان نے ہدف کے تعاقب میں سات وکٹوں کے نقصان پر 316 رنز بنا لیے ہیں۔

منگل کو سلہٹ میں چوتھے روز کے کھیل کے اختتام پر محمد رضوان 75 اور ساجد خان آٹھ رنز کے ساتھ کریز پر موجود ہیں جبکہ پاکستان کو جیت کے لیے 121 رنز درکار ہیں۔