یوم عرفہ: مسجد نمرہ میں عازمین حج کے خیر مقدم کے لیے تیاریاں مکمل

سعودی وزارت اسلامی امور نے منگل کو یوم عرفہ کے موقع  پرعازمین حج کے خیر مقدم کے لیے مسجد نمرہ کی تیاریوں میں اضافہ کیا ہے۔

 بڑی تعداد میں عازمین کی آمد کے پیش نظر مسجد نمرہ میں ایک لاکھ 25 ہزار مربع میٹر کے  رقبے کو اعلی معیار کے قالینوں سے آرستہ کیا گیا ہے۔

ایس پی اے کے مطبق گزشتہ برسوں کے دوران آپریشنل اور تیکنیکی کارکردگی بہتر بنانے کے لیے وسیع ترقیاتی منصوبے مکمل کیے گئے ہیں۔

ان منصوبوں میں ایئرکنڈیشنگ، وینٹی لیشن، انفرا سٹرکچر، آڈیو سسٹم کی اپ گریڈیشن، ماحول کو ٹھنڈا رکھنے کے منصوبے اور پانی کی فراہمی کی خدمات میں توسیع شامل ہے۔

نمایاں منصوبوں میں سے عقبی حصے کو ٹھنڈا رکھنے کے لیے 19 کینوپیز کی تنصیب شامل ہے، جو درجہ حرارت کو دس ڈگری سینٹی گریڈ تک کم کرنے میں مدد دیتی ہے۔

 ہائی پریشر پمپوں سے چلنے والے 117 مسٹنگ پنکھوں کے ذریعے ماحول کو ٹھنڈا کیا گیا ہے، جس سے درجہ حرارت 9 ڈگری سینٹی گریڈ تک کم کرنے میں مدد ملتی ہے۔

مرکزی کنٹرول سسٹم کو کاربن ڈائی آکسائیڈ کی سطح کی مانیٹرنگ کےلیے اپ گریڈ کیا گیا ہے۔ پانی کے پمپوں کی کارکردگی کو بہتر بنانے کے علاوہ 70 واٹر کولنگ یونٹ بھی نصب کیے گئے ہیں۔

 میدان عرفات میں مسجد نمرہ کہاں ہے؟

میدان عرفات میں واقع مسجد نمرہ جسے مسجد عرفہ بھی بھی جاتا ہے، یہاں وقوف عرفہ کے دن خطبہ حج دیا جاتا ہے۔ ظہر وعصر کی نمازیں ایک اذان و دواقامت کے ساتھ پڑھائی جاتی ہیں۔ 

مسجد نمرہ میدان عرفات کی مغربی جانب واقع ہے۔ اس سے متصل وادی ’عرنہ ‘ ہے مسجد کی دیوار مکہ مکرمہ کے رخ پر ہے جبکہ وادی عرنہ کا شمار میدان عرفات میں نہیں ہوتا۔ 

سعودی حکومت کی توسیع سے قبل مسجد نمرہ کی لمبائی 90 جبکہ چوڑائی 80 میٹر ہوا کرتی تھی۔ 

 توسیع  کے بعد مسجد کا رقبہ ایک لاکھ 10 ہزار مربع میٹرہو گیا جبکہ دوسری منزل بھی تعمیر کرائی گئی جس کا رقبہ 27 ہزار مربع میٹر ہے۔

مسجد نمرہ دنیا کی بڑی مساجد میں سے ادیک ہے جہاں چار لاکھ نمازیوں کی گنجائش ہے، اس میں 72 دروازے اور داخلی راستے ہیں۔