جزائر فرسان کا ’جبل کوشکش‘ غوطہ خوروں اور ماہی گیروں کے لیے اہم کیوں تھا؟
جمعہ 16 اکتوبر 2026 20:31
جبل کوشکش فرسان کے چھوٹے جزیرے ’السقید‘ کے گاؤں ابوالطوق میں واقع ہے (فوٹو: ایس پی اے)
جازان ریجن میں بیشتر مقامات کا عہدِ رفتہ سے گہرا تعلق رہا ہے، ان ہی مقامات میں جزائر فرسان میں واقع ’جبل کوشکش‘ بھی شامل ہے۔
سعودی پریس ایجنسی کے مطابق ساحل پر موجود یہ پہاڑی ماضی میں ماہی گیروں اور موتیوں کی تلاش میں غوطہ خوری کرنے والوں کے لیے کافی اہم مانا جاتا تھا۔
علاقے کی تاریخ سے باخبر ٹور گائیڈ عثمان حمق کا کہنا ہے کہ کوشکش پہاڑ کا شمار ماضی میں موتیوں کی تلاش میں غوطہ خوری کرنے والوں کے علاوہ ماہی گیروں کی سرگرمیوں کے لیے اہم مرکز کے طور پر مانا جاتا تھا۔
یہ پہاڑ فرسان کے چھوٹے جزیرے ’السقید‘ کے گاؤں ابوالطوق میں واقع ہے، جو فرسان شہر سے 60 کلو میٹر دوری پر ہے۔ اس جگہ کو ’شاطی کوشکش‘ یعنی کوشکش کا ساحل کہا جاتا ہے۔
جبل کوشکش اپنی منفرد چٹانی ساخت کے باعث نمایاں حیثیت رکھتا ہے۔ یہاں مختلف اشکال کی چٹانیں، غار، قدرتی کھوہیں اور گزرگاہیں ہیں، جبکہ بعض چٹانیں قدرتی طور پر اس انداز میں باہر کو نکلی ہوئی ہیں کہ وہ چھتریوں کی طرح دکھائی دیتی ہیں۔

کوشکش پہاڑ، ماضی میں سمندری سفر سے واپس آنے والے غوطہ خوروں کے لیے کافی اہم تھا کیونکہ وہ یہاں آرام کرتے اور اسی دوران سمندر کی تہہ سے جمع کی ہوئی سیپیاں کھولتے اور ان میں موجود موتیوں کو نکالتے تھے، جبکہ ماہی گیروں کے لیے بھی یہ مقام آرام کرنے اور سفر کی تھکن اتارنے کا اہم مرکز مانا جاتا تھا۔
ٹور گائیڈ عثمان کا مزید کہنا تھا کہ یہاں موجود بعض چٹانی ساختوں کی بلندی تین سے چھ میٹر تک ہے۔ یہ مقام آج بھی اپنی قدرتی انفرادیت کو برقرار رکھے ہوئے ہے۔

دورِ حاضر میں سیر و تفریح کے شوقین افراد یہاں کے ساحلی ماحول سے لطف اندوز ہونے کے لیے یہاں کا رخ کرتے ہیں جبکہ موسم سرما میں سیاحوں کی یہاں آمد میں مزید اضافہ ہوجاتا ہے۔
