حج قوانین کی خلاف ورزی کرنے والے آٹھ افراد کے خلاف فیصلے جاری

سعودی وزارت داخلہ نے حج پرمٹ کے بغیر 21 افراد کو مکہ مکرمہ لے جانے کی کوشش کرنے والے ایک غیرملکی اور7 سعودی شہریوں کے خلاف کارروائی کی ہے۔

سعودی خبررساں ادارے ایس پی اے کے مطابق وزارت نے سیزنل انتظامی کمیٹیوں کے ذریعے ٹرانسپورٹرز، ان کے معاونین اور پرمٹ کے بغیر مکہ جانے کی کوشش کرنے والوں کے خلاف انتظامی فیصلے جاری کیے۔

سزاوں میں قید، ایک لاکھ ریال تک جرمانہ، ٹرانسپورٹرز کی تشہیر، غیرملکیوں کی بے دخلی کے ساتھ 10 برس دوبارہ داخلے پر پابندی شامل ہے۔

خلاف ورزی میں استعمال ہونے والی گاڑیوں کو ضبط کرنے کے لیے قانونی کارروائی کی جائے گی۔

پرمٹ کے بغیر مکہ میں داخلے کی کوشش پر 20 ہزار ریال تک جرمانہ ہے۔

وزارت کی جانب سے سعودی شہریوں اور غیرملکیوں کو حج  قوانین پر سختی سے عمل کرنے کی ہدایت کی گئی ہے جس کا مقصد عازمین حج کو ہر ممکن سہولت فراہم کرنا ہے۔