سعودی عرب، شام کو 16 لاکھ 50 ہزار بیرل خام تیل دے گا

خادم حرمین شریفین شاہ سلمان بن عبد العزیز آل سعود اور ولی عہد شہزادہ محمد بن سلمان بن عبد العزیز آل سعود کی ہدایت پر سعودی عرب نے سعودی فنڈ فار ڈویلپمنٹ کے ذریعے شام کو 16 لاکھ 50 ہزار بیرل خام تیل بطور گرانٹ فراہم  کرے گا۔

سعودی پریس ایجنسی کے مطابق دونوں ملکوں کے درمیان مفاہمتی یادداشت پر دستخط ہوئے ہیں۔

مفاہمتی یادداشت پر سعودی فنڈ فار ڈویلپمنٹ کے چیف ایگزیکٹو سلطان بن عبدالرحمن المرشد اور شام کے وزیر توانائی انجینئر محمد البشیر نے دستخط کئے ہیں۔

 اس موقع پر شام میں سعودی سفیر ڈاکٹر فیصل المجفل اور وزارتِ توانائی کے ایڈوائزر برائے فنی و ریگولیٹری امور برائے پیٹرول و گیس انجینئر ماجد العتیبی بھی موجود تھے۔

یہ گرانٹ شام کی ریفائنریوں کے آپریشن کو تقویت دینے، ان کی مالی و آپریشنل پائیداری کو یقینی بنانے، ملکی معیشت کو سہارا دینے اور اہم پیداواری شعبوں کی ترقی کے ساتھ ساتھ معاشی چیلنجز سے نمٹنے میں مددگار ثابت ہوگی۔

 اس کے ذریعے قومی و بین الاقوامی سطح پر پائیدار ترقی کے اہداف کے حصول کی کوششوں کو بھی تقویت ملے گی۔

یہ گرانٹ سعودی عرب کی جانب سے برادر شامی عوام کی زندگی کے حالات بہتر بنانے کے لیے کی جانے والی کوششوں اور دونوں ملکوں کے گہرے تعلقات کا مظہر ہے۔