’کھیل کے ساتھ تعلیم بھی‘ ، نوجوان پاکستانی کرکٹرز کو تعلیمی سکالرشپ دینے کا معاہدہ

پاکستان کرکٹ بورڈ (پی سی بی) اور ایجوکیشن سروسز لمیٹڈ (بیکن ہاؤس) کے درمیان ایک معاہدہ طے پایا ہے جس کے تحت کرکٹرز کے لیے تعلیمی سکالرشپس دیے جائیں گے۔

پی سی بی کے اتوار کو جاری کردہ بیان کے مطابق اس معاہدے پر اتوار کو پی سی بی ہیڈ کوارٹر، لاہور دستخط کی تقریب منعقد ہوئی۔

معاہدے کے تحت ملک کے 16 ریجنز سے تعلق رکھنے والے انڈر 15، انڈر 17 اور انڈر 19 کیٹیگریز کے 120 نمایاں کھلاڑیوں کو مفت تعلیم دی جائے گی۔ نوجوان کرکٹرز کے لئے تعلیمی وظائف کا معاہدہ 3 برس تک نافذالعمل رہے گا۔

تقریب کے مہمان خصوصی چیئرمین پی سی بی محسن نقوی نے کہا کہ ’تعلیمی وظائف کا معاہدہ دورس نتائج کا حامل ہو گا۔ نوجوان کرکٹرز کھیل کے ساتھ  تعلیم پر بھی پوری توجہ  دے سکیں گے۔‘

انہوں نے کہا کہ بیکن ہاؤس سے شراکت داری سے مستقبل کے کرکٹ سٹارز کی تعلیمی ضروریات کو پورا کیا جا سکے گا اور تعلیمی سکالرشپ کا دائرہ کار کو مزید وسعت دی جائے گی۔‘

معاہدے پر  دستخط کی تقریب میں پاکستان وائٹ بال ٹیم کے ہیڈ کوچ مائیک ہیسن، ڈائریکٹر ڈومیسٹک کرکٹ عبداللہ خرم نیازی، جی ایم ڈومیسٹک جنید ضیا، بیکن ہاؤس کے چیف آپریٹنگ آفیسر علی احمد خان، اے ڈی آپریشنز فیصل نثار، جنرل منیجر سیدہ ارم نقوی اور منیجر سپورٹس تانیا ملک نے شرکت کی۔