’پاکستان کے حملے میں تین کھلاڑی ہلاک‘، افغان کرکٹ بورڈ کا سہ ملکی سیریز سے دستبرداری کا اعلان

پاکستان کے افغانستان پر حملے میں تین مقامی کھلاڑی ہلاک ہو گئے ہیں جس کے بعد کابل نے ٓآئندہ ماہ ہونے والی سہ فریقی کرکٹ سیریز سے دستبرداری کا اعلان کیا ہے۔

خبر رساں ادارے اے ایف پی کے مطابق افغان کرکٹ بورڈ نے کہا ہے کہ میچ میں شرکت کے لیے کھلاڑی پاکستان کی سرحد پر واقع شمالی صوبہ پکتیکا کے شہر ارگون سے شارانہ آئے تھے، واپس جاتے ہوئے پاکستان کے حملے کا نشانہ بنے۔ 

افغان کرکٹ بورڈ نے بتایا کہ ہلاک ہونے والوں میں کبیر، سغبت اللہ اور ہارون شامل ہیں تاہم حملے کی تفصیل نہیں دی۔

کرکٹ بورڈ نے متاثرہ خاندانوں سے افسوس کا اظہار کرتے ہوئے کہا کہ ’افغانستان کی سپورٹس کمیونٹی، ایتھلیٹس اور کرکٹ فیملی کے لیے بہت بڑا نقصان ہے۔‘

افغان کرکٹ بورڈ نے اعلان کیا کہ ’متاثرین کے احترام میں‘ پاکستان، افغانستان اور سری لنکا کے درمیان آئندہ ماہ ہونے والی سہ فریقی سیریز نہیں کھیلیں گے۔

افغان کرکٹ ٹیم کے قومی کھلاڑی محمد نبی نے سوشل میڈیا پر پوسٹ میں کہا کہ ’یہ واقعہ صرف پکتیکا کے لیے ہی نہیں بلکہ پوری افغان کرکٹ فیملی اور قوم کے لیے ایک سانحہ ہے۔‘

دوسری جانب پاکستان کے سکیورٹی ذرائع نے کہا ہے کہ فورسز نے افغانستان کی سرحد پر تحریک طالبان پاکستان (ٹی ٹی پی) کے حافظ گل بہادر گروپ کے ٹھکانوں کو ’انتہائی درستی سے فضائی حملوں کا نشانہ‘ بنایا ہے۔

اے ایف پی کے مطابق یہ حملے دونوں ممالک کے درمیان جنگ بندی میں توسیع کے اعلان کے بعد جمعے اور سنیچر کی درمیانی شب کیے گئے ہیں۔

ایک سینیئر طالبان عہدیدار نے اے ایف پی کو اپنا نام ظاہر نہ کرنے کی شرط پر بتایا کہ ’پاکستان نے جنگ بندی کی خلاف ورزی کی ہے اور پکتیکا صوبے میں تین مقامات پر بمباری کی ہے جس کے نتیجے میں کم از کم 10 افراد ہلاک ہوئے ہیں۔‘

پاکستان کا مؤقف ہے کہ حافظ گل بہادر گروپ افغانستان سے متصل شمالی وزیرستان میں واقع ایک فوجی کیمپ پر خودکش حملے میں ملوث تھا جس کے نتیجے میں سات پاکستانی فوجی اور پیرا ملٹری اہلکار جان سے گئے تھے۔