’پاکستانی عازمین حج 2026 کے لیے تربیتی پروگرام یکم جنوری سے شروع ہو گا‘

وفاقی سیکرٹری مذہبی امور ڈاکٹر سید عطاء الرحمان نے کہا ہے کہ پاکستان کے عازمین حج کے لیے تربیتی پروگرام یکم جنوری سے شروع ہو گا۔

وزارتِ امور حج کی جانب سے جاری کیے گئے بیان کے مطابق وفاقی سیکریٹری مذہبی امور کی زیرِصدارت نصاب کمیٹی برائے تربیت حجاج کا اجلاس  منعقد ہوا۔

وفاقی سیکریٹری مذہبی امور نے بتایا کہ عازمین حج 2026 کے لیے تربیتی پروگرام یکم جنوری سے شروع ہو گا۔

انہوں نے کہا کہ ایک روزہ تربیتی پروگرام میں شرکت کرنا لازمی ہو گا۔ ’عازمین حج اپنے شیڈول کے مطابق تربیتی پروگرام میں لازمی شرکت کریں۔‘

بیان کے مطابق تربیتی شیڈول کی اطلاع بذریعہ پاک حج 2025 موبائل ایپ، ویب سائٹ اور ایس ایم ایس کے ذریعے دی جائے گی۔

وزارت نے کہا ہے کہ تربیتی پروگرام عازمین حج کی مناسک اور انتظامی امور سے درست آگہی کے لیے لازمی قرار دیا گیا ہے۔

’وزارت اور حاجی کیمپوں کے تجربہ کار ماسٹر ٹرینرز اور علما ملٹی میڈیا کے ذریعے تربیت فراہم کریں گے۔‘

سربراہ نصاب کمیٹی جوائنٹ سیکریٹری احمد ندیم خان نے بریفنگ دی جبکہ ڈپٹی سیکریٹری ناصر عزیز خان، فہد احمد، رانا محمد مجاہد اور دیگر ماسٹر ٹرینرز نے شرکت کی۔