حالیہ دنوں وزیراعلیٰ پنجاب مریم نواز کے صاحبزادے جنید صفدر کی شادی کی تقریبات سوشل میڈیا پر خاصی توجہ کا مرکز رہیں۔
اس موقع پر دلہن شانزے علی روحیل، مریم نواز کے ملبوسات، زیورات اور شادی میں پیش کیے گئے کھانوں پر بھی خاصی گفتگو ہوتی رہی۔
مزید پڑھیں
ان تقریبات کے دوران ایک اور موضوع بھی زیرِ بحث آیا، جو پنجاب کی سینئر وزیر مریم اورنگزیب کی تصاویر سے متعلق تھا۔
شادی کی مختلف تقریبات میں سامنے آنے والی تصاویر میں مریم اورنگزیب کی ظاہری تبدیلی سوشل میڈیا صارفین کی توجہ کا باعث بنی، جس پر مختلف آرا اور سوالات سامنے آئے۔
پیر کے روز ایک صحافی کی مریم اورنگزیب کی والدہ سے ملاقات کے دوران اس معاملے پر گفتگو ہوئی، جس میں صحافی نے مریم اورنگزیب کی والدہ سے اس تبدیلی کے حوالے سے سوالات کیے۔
پنجاب کی سینئر وزیر مریم اورنگزیب کی شخصیت کیسے اچانک سے تبدیل ہوئی ؟ میرا سوال
میری بیٹی پچھلے کوئی 2۔۔3 ماہ سے بڑی سخت ڈائٹ پر ہیں میں نے بھی منع کیا ہے وہ صرف چائے اور کافی پی رہی ہیں، اب تھوڑی پتلی ہوئی ہیں تو ایسی لگ رہی ہیں باقی کوئی سرجری وغیرہ نہیں کروائی،طاہرہ اورنگزیب pic.twitter.com/rEpfbkCl0K
— Ahsan Wahid (@AhsanWahid13) January 19, 2026
صحافی نے استفسار کیا کہ آیا مریم اورنگزیب کی ظاہری تبدیلی کسی خاص تیاری، علاج یا سرجری کا نتیجہ ہے، یا اس کے پیچھے کوئی اور وجہ ہے۔
اس پر مریم اورنگزیب کی والدہ نے وضاحت کرتے ہوئے کہا کہ ان کی بیٹی نے کوئی سرجری نہیں کروائی اور نہ ہی کسی قسم کا طبی عمل کرایا گیا ہے۔
ان کے مطابق مریم اورنگزیب نے گزشتہ دو سے تین ماہ کے دوران سخت ڈائٹ اختیار کی، جس کے نتیجے میں ان کا وزن کم ہوا۔ وزن میں کمی کی وجہ سے چہرے میں قدرتی طور پر فرق محسوس ہوا، تاہم اس کے علاوہ کوئی اور تبدیلی نہیں ہے۔
انہوں نے مزید کہا کہ وزن کم کرنا ایک ذاتی فیصلہ تھا اور اس کا مقصد کسی تقریب یا تصاویر کے لیے خصوصی تیاری نہیں تھا۔ ان کے مطابق وزن میں کمی کے باعث چہرہ نسبتاً چھوٹا دکھائی دینے لگا، جسے بعض افراد نے غیر ضروری قیاس آرائیوں سے جوڑ دیا۔
اس وضاحت کے بعد سوشل میڈیا پر جاری بحث کے ایک پہلو کو واضح کیا گیا، جبکہ متعلقہ خاندان کی جانب سے اس معاملے پر مزید کسی تبصرے یا ردعمل کا اظہار نہیں کیا گیا۔
