جنید صفدر کا ٹریفک چالان، وزیراعلیٰ مریم نواز کی ’پولیس ٹیم کو شاباش‘

وزیراعلیٰ پنجاب مریم نواز نے اپنے بیٹے کی گاڑی کا چالان کرنے پر لاہور ڈولفن پولیس کی ٹیم کی تعریف کی ہے۔

پیر کو وزیراعلیٰ ہاؤس سے جاری ہونے والے بیان کے مطابق ’وزیراعلیٰ پنجاب مریم نواز شریف نے جنید صفدر کے ساتھ سکیورٹی گاڑی کا چالان کرنے والی ڈولفن پولیس ٹیم کے انچارج شاہ زیب، اہلکاروں پرویز، حیدر اور مجاہد کو شاباش دی ہے۔‘

وزیراعلیٰ مریم نواز نے پولیس ٹیم سے کہا کہ ’آپ نے قانون کی پاسداری کو یقینی بنایا۔ قانون کی بالادستی ہی ہماری حکومت کی پہچان ہے۔‘

انہوں نے کہا کہ ’پورے پنجاب میں قانون کا یکساں نفاذ اور پاسداری دیکھنا چاہتی ہوں۔‘

بیان کے مطابق ’جنید صفدر کے ہمراہ سکیورٹی گاڑی کا ٹریفک کی خلاف ورزی پر چالان کیا گیا تھا۔‘