پیٹرولیم مصنوعات کی بلاتعطل دستیابی کو یقینی بنانا حکومت کی اولین ترجیح ہے: وزیر خزانہ

پاکستان میں حکام نے مشرق وسطیٰ کی صورتحال کے تناظر میں ملک کے اندر پیٹرولیم مصنوعات کی مارکیٹ میں فراہمی کو برقرار رکھنے کے لیے کڑی نگرانی کرنے کی ضرورت پر زور دیا ہے۔

خطے کی صورتحال کے پیش نظر پاکستان میں پیٹرول کی قیمتوں پر نظر رکھنے والی کمیٹی کا اجلاس بدھ کو ہوا۔

وزارت خزانہ سے جاری بیان کے مطابق وزیراعظم کی جانب سے تشکیل دی گئی کمیٹی کے اجلاس کی صدارت وفاقی وزیر خزانہ محمد اورنگزیب نے کی۔

کمیٹی نے توانائی کی ابھرتی ہوئی علاقائی اور عالمی صورتحال پر گفتگو کی اور ملک بھر میں پیٹرولیم سٹاک کی سطح اور سپلائی چینز کا تفصیلی جائزہ لیا۔ کمیٹی میں اجلاس کے شرکا کو خام تیل اور ریفائنڈ پیٹرولیم مصنوعات بشمول پیٹرول، ڈیزل، ایوی ایشن فیول اور ایل پی جی کے ملکی سٹاک کی سطح کے ساتھ ان کے متعلقہ دنوں کے سٹاک اور روزانہ کی کھپت کے پیٹرن کے بارے میں بتایا گیا۔

اجلاس کو تیل کی عالمی منڈی میں ہونے والی پیش رفت کے بارے میں بھی بریفنگ دی گئی، جس میں بین الاقوامی معیار کی قیمتوں، مال برداری اور انشورنس کے اخراجات، شپنگ روٹ کی حرکیات، اور اہم میری ٹائم کوریڈورز میں بدلتے ہوئے حالات شامل ہیں۔

کمیٹی میں بین الاقوامی توانائی کی مارکیٹ میں اتار چڑھاؤ، خاص طور پر آبنائے ہرمز کے ارد گرد کی غیریقینی صورتحال کے باعث توانائی کی عالمی تجارت پر اس کے اثرات کو بھی زیرِ غور لایا گیا۔

وزیر خزانہ نے اس بات پر زور دیا کہ پیٹرولیم مصنوعات کی بلاتعطل دستیابی کو یقینی بنانا حکومت کی اولین ترجیح ہے اور تمام پالیسی فیصلوں کی رہنمائی جاری رکھی جائے گی۔

انہوں نے اس بات کا اعادہ کیا کہ کمیٹی روزانہ کی بنیاد پر پیش رفت کی نگرانی کر رہی ہے اور قومی توانائی کے تحفظ اور مقامی منڈیوں میں استحکام کو برقرار رکھنے کے لیے بروقت اور مربوط اقدامات کرنے کے لیے تیار ہے۔

اجلاس میں شرکا نے ایل این جی اور ایل پی جی مارکیٹوں میں ہونے والی پیش رفت کا بھی جائزہ لیا۔ کمیٹی کو بتایا گیا کہ طویل المدتی انتظامات کے تحت ایل این جی کی درآمد پاکستان کی توانائی کی سپلائی کا ایک اہم جزو بنی ہے، علاقائی ترسیلی راستوں میں رکاوٹیں عالمی ایل این جی لاجسٹکس کو متاثر کر سکتی ہیں۔ بلاتعطل گھریلو دستیابی کو یقینی بنانے کے لیے سرحد پار چینلز کے ذریعے ایل پی جی کی آمد پر بھی کڑی نظر رکھی جا رہی ہے۔

کمیٹی نے موجودہ علاقائی صورتحال میں پیٹرولیم مصنوعات کی ذخیرہ اندوزی اور سمگلنگ کو روکنے کی اہمیت پر بھی زور دیا۔ متعلقہ حکام کو اس حوالے سے چوکس رہنے اور صوبائی حکومتوں کے ساتھ ہم آہنگی کو مضبوط بنانے کی ہدایت کی گئی ہے تاکہ مقامی مارکیٹ میں غیریقینی صورتحال پیدا ہونے سے بچا جا سکے۔