رُوس میں ملازمت کے مواقع، غیرملکی ورکرز کو راغب کرنے کے لیے نیا آن لائن پروگرام متعارف

روس نے بڑھتی ہوئی لیبر کی کمی کے پیشِ نظر غیر ملکی کارکنوں کو متوجہ کرنے کے لیے ایک نیا ڈیجیٹل پروگرام شروع کر دیا ہے۔

برطانوی خبر رساں ایجنسی روئٹرز کے مطابق روسی وزارتِ خارجہ کا کہنا ہے کہ اس سروس کے ذریعے غیرملکی شہری ملک میں رہائش اور ملازمت کے لیے آن لائن درخواست دے سکیں گے۔

یہ اعلان بدھ کو سوشل میڈیا پلیٹ فارم ایکس پر کیا گیا ہے۔

روس کو یوکرین جنگ کے آغاز کے بعد مختلف شعبوں میں شدید افرادی قوت کی کمی کا سامنا ہے، جہاں لاکھوں افراد فوج میں شامل ہو چکے ہیں جبکہ دفاعی صنعتوں نے بھی بڑی تعداد میں کارکنوں کو اپنی جانب کھینچ لیا ہے، جس سے شہری اداروں میں خلا پیدا ہوا۔

سنہ2022 سے اب تک روس سے بڑی تعداد میں افراد ملک چھوڑ کر بھی جا چکے ہیں، جس کی وجہ جنگ کے بعد سخت سیاسی کنٹرولز اور پابندیاں قرار دی جا رہی ہیں۔

’ٹائم ٹو لِو اِن ریشیا‘ نامی اس پروگرام کا مقصد ایسے غیر ملکی افراد کو راغب کرنا ہے جو مطلوبہ مہارت رکھتے ہوں اور روسی روایتی اقدار کا احترام کرتے ہوں۔ تاہم وزارتِ خارجہ کی جانب سے دیے گئے ویب لنک پر بدھ کے روز ایرر سامنے آئی۔

اس پروگرام کے تحت سائنسدان، کاروباری افراد، کھلاڑی، تخلیقی شعبوں سے وابستہ افراد، باصلاحیت طلبہ و گریجویٹس، سرمایہ کار اور دیگر ماہرین درخواست دینے کے اہل ہوں گے۔

درخواست دہندگان کو ایک درخواست فارم اور مختصر سی وی جمع کروانا ہوگی، اپنی اہلیت کے ثبوت فراہم کرنے ہوں گے، آن لائن انٹرویو دینا ہوگا اور پھر فیصلہ آنے کا انتظار کرنا ہوگا، جس کے لیے زیادہ سے زیادہ 125 دن کا وقت مقرر کیا گیا ہے۔

کامیاب درخواست دہندگان کو ایک ذاتی منیجر فراہم کیا جائے گا جو ویزا، سرحدی کارروائیوں اور رہائش کے انتظامات میں مدد کرے گا۔