پاکستان سے حج پروازوں کا سلسلہ جاری، 2600 سے زائد عازمین مدنیہ پہنچ گئے

سعودی عرب میں حج سیزن کی آمد کے ساتھ ہی عازمینِ حج کی آمد کا سلسلہ شروع ہو گیا ہے۔

 وزارت مذہبی امور سے جاری ہونے والی تفصیلات کے مطابق پاکستان سے پری حج پروازوں کے ذریعے 2687 پاکستانی عازمینِ حج مدینہ منورہ پہنچ چکے ہیں۔

مدینہ منورہ میں تعینات کوآرڈینیٹر کاشف حسین اور وزارتِ مذہبی امور کے دیگر حکام نے عازمین کو ان کی رہائش گاہوں پر خوش آمدید کہا۔

حکام کے مطابق عازمین کی آمد کے پیشِ نظر تمام تر انتظامات کو حتمی شکل دے دی گئی ہے تاکہ انہیں قیام اور سفری سہولیات کے دوران کسی قسم کی دشواری کا سامنا نہ کرنا پڑے۔

استقبالیہ تقریبات پاکستانی عازمین کی آمد کو خوشگوار بنانے کے لیے مدینہ میں ایک باقاعدہ استقبالیہ تقریب کا اہتمام کیا گیا۔

اس موقعے پر کیک کاٹنے کی رسم ادا کی گئی اور عازمین کے اعزاز میں ایک خصوصی عشائیہ بھی دیا گیا۔ منتظمین کا کہنا ہے کہ ان اقدامات کا مقصد نہ صرف عازمین کو بہترین سہولیات کی فراہمی ہے بلکہ انہیں ایک پرتپاک ماحول فراہم کرنا بھی ہے تاکہ وہ اپنے مذہبی فرائض کی ادائیگی کے لیے پرسکون رہ سکیں۔

اسلام کے پانچویں رکن ’حج‘ کی ادائیگی کے لیے دنیا بھر سے لاکھوں مسلمانوں کی سعودی عرب آمد متوقع ہے۔

حکام کے مطابق آنے والے چند ہفتوں میں زائرین کی تعداد میں مزید اضافہ ہو گا۔

سعودی حکام عازمین کے لیے وسیع تر انتظامات کر رہے ہیں تاکہ اس سالانہ عالمی اجتماع کو منظم اور پرامن بنایا جا سکے۔

پاکستان سے عازمینِ حج کی روانگی کا یہ سلسلہ حج کے ایام سے قبل تک جاری رہے گا جس کے لیے وزارتِ مذہبی امور کی جانب سے نقل و حمل اور رہائش کے معاملات کی نگرانی کی جا رہی ہے۔