ریڈ سی فلم فاؤنڈیشن کا ’48 آور فلم چیلنج‘، 15 ٹیمیں منتخب

ریڈ سی فلم فاؤنڈیشن نے ریڈ سی 48 آور فلم چیلنج کے چھٹے ایڈیشن میں شرکت کے لیے منتخب ہونے والی 15 ٹیموں کا اعلان کر دیا ہے۔

سعودی پریس ایجنسی (ایس پی اے) کے مطابق اس سال مملکت بھر سے ابھرتے ہوئے فلم سازوں کی جانب سے ریکارڈ 127 درخواستیں موصول ہوئی تھیں۔

الائنس فرانسس اور جدہ میں فرانس کے قونصلیٹ جنرل کے اشتراک سے پیش کیا جانے والا یہ سالانہ چیلنج 18 سے 25 سال کی عمر کے سعودی شہریوں اور مملکت کے رہائشیوں کو ایک سخت اور باہمی تعاون کے ماحول میں فلم سازی کے مکمل عمل یعنی خیال، سوچنے اور سکرپٹ لکھنے سے لے کر شوٹنگ، ایڈیٹنگ اور فائنل فلم تیار کرنے تک کا تجربہ حاصل کرنے کا بہترین موقع فراہم کرتا ہے۔

منتخب ٹیمیں اپنے سفر کا آغاز تین ماہر فلم سازوں اور تخلیقی شعبے کے ماہرین کی زیر نگرانی تربیتی ورکشاپس سے کریں گی جن میں پروڈکشن ڈیزائن، فلم سازی اور سکرپٹ رائٹنگ جیسے موضوعات سکھائے جائیں گے۔

ورکشاپس کے بعد ٹیموں کے پاس دیے گئے موضوعات پر ایک مختصر فلم لکھنے، شوٹ کرنے اور ایڈٹ کرنے کے لیے صرف 48 گھنٹے ہوں گے۔ اس کے علاوہ ہر فلم میں ایک حیران کر دینے والا سِین اور ’پروپ ایلیمنٹ‘ کو شامل کرنا لازمی ہوگا جس کا انکشاف شوٹنگ شروع ہونے سے کچھ دیر پہلے کیا جائے گا۔

مقابلے میں کامیابی حاصل کرنے والی دو ٹیموں کو  ٹرافیاں دی جائیں گی۔ دونوں جیتنے والی ٹیموں کے لیڈرز کو سال 2027 میں فرانس میں بین الاقوامی ریزیڈنسی کا موقع دیا جائے گا اور ان دونوں فلموں کو ریڈ سی انٹرنیشنل فلم فیسٹیول کے اگلے ایڈیشن میں دکھایا جائے گا۔

یہ چیلنج سعودی عرب میں نوجوان ٹیلنٹ کو نکھارنے کے لیے ریڈ سی فلم فاؤنڈیشن کی سال بھر کی کوششوں کا حصہ ہے۔ علمی تربیت، پیشہ وارانہ رہنمائی، باہمی اشتراک اور بین الاقوامی سطح پر پہچان فراہم کر کے یہ چیلنج شرکاء کو اپنی تخلیقی آواز کو مضبوط کرنے، پیشہ وارانہ تجربہ حاصل کرنے اور فلم انڈسٹری میں پہلا قدم رکھنے میں مدد دیتا ہے۔