کورونا سے کیسے لڑیں؟ علی ظفر کا گانا ریلیز ہوتے ہی ہٹ

چین سے دنیا بھر میں پھیلنے والا کورونا وائرس پاکستان بھی پہنچ گیا ہے اور ملک بھر میں اس وائرس سے متاثرہ مریضوں کی تعداد 53 ہو گئی ہے۔

ایسے میں ایک طرف حکومت پاکستان اور محکمہ صحت اس وبا کی روک تھام کے لیے اقدامات کر رہے ہیں تو دوسری جانب مختلف مشہور شخصیات بشمول کھلاڑی، اداکار اور گلوکار بھی اس حوالے سے آگاہی پھیلا رہے ہیں۔

پاکستان کے معروف گلوگار علی ظفر نے بھی کورونا سے آگاہی کے لیے ایک گانا ریلیز کیا ہے۔

سوشل میڈیا پر پر ریلیز کیے گئے اس گانے ’کو کو کورونا‘ میں علی ظفر نے اس بات پر زور دیا ہے کہ اس بیماری سے ڈرنا نہیں بلکہ لڑنا ہے۔

علی ظفر نے مشہور گانے ’کو کو کورینا‘ کی دھن پر ہی اس گانے کو ترتیب دیا ہے اور پاکستانیوں کو بتایا کہ وہ کس طرح سے کورونا سے لڑ سکتے ہیں۔

علی ظفر نے گانے کے آخر میں پیغام دیا کہ اپنا خیال رکھیں اور حفاظت کریں، اس گانے کو شیئر بھی کریں۔

سوشل میڈیا صارفین نے علی ظفر کی اس کاوش کو سراہا ہے اور اس حوالے سے مختلف تبصرے کیے جا رہے ہیں۔

جویریہ صدیق نامی ایک صارف نے لکھا ’واہ واہ چھا گئے صاحب۔‘

اقرا رفیق نامی صارف نے لکھا کہ ’پوری دنیا ڈری ہوٸی ہے ایک واحد ہم پاکستانی قوم ہیں جو اس واٸرس کا مذاق اُڑا رہے ہیں۔ ویسے اچھا تھا گانا۔‘

راحیل مظہر نامی صارف نے لکھا کہ ’لوگوں کو خوشیاں دینا بھی نیکی ہے۔‘