محمد یوسف نے منفرد انداز کا مالک ننھا پرستار ڈھونڈ لیا

سابق پاکستانی کرکٹر اور ٹیم کے موجودہ بیٹنگ کوچ محمد یوسف نے منفرد بیٹنگ سٹائل کی وجہ سے انٹرنیٹ پر وائرل ہونے والے ننھے پرستار سے ملاقات کرلی۔

منگل کو سماجی رابطوں کی ویب سائٹ ٹوئٹر پر محمد یوسف نے بچے سے ملاقات کرنے کے بارے میں ٹویٹ کیا۔

ٹویٹ کے ساتھ شیئر کی گئی وڈیو میں دیکھا جاسکتا ہے کہ ننھے کرکٹر سمیت ان کے اہل خانہ محمد یوسف سے مل کر کافی خوش دکھائی دے رہے ہیں۔ اس موقع پر انہوں نے بچے کو بیٹنگ کے بارے میں قیمتی ٹپس اور مشورے بھی دیے۔

محمد یوسف نے اپنی ٹویٹ میں لکھا ہے کہ ’دو دن پہلے بچے کی وڈیو پوسٹ کی تھی، آپ سب کا شکریہ، آج اس سے ملاقات ہوگئی۔ اس بچے کی اتنی چھوٹی سی عمر میں بیٹ سپیڈ، ہینڈ آئی کوآرڈینشن اچھی تھی، مگر ہم نے اپنے بچوں کو وہ چیزیں سکھانی ہیں کہ آگے چل کر وہ ہر فارمیٹ کھیل سکیں۔ بچوں کی حوصلہ افزائی بہت ضروری ہے، یہی بچے آگے چل کر ملک کا نام روشن کریں گے۔‘

اس سے پہلے محمد یوسف نے سنیچر کے روز اس بچے کی وڈیو اپلوڈ کرتے ہوئے ان کے بارے میں معلومات دینے کی درخواست کی تھی۔

وڈیو میں دیکھا جاسکتا تھا کہ لگ بھگ 10 سے 12 برس کا ایک بچہ انتہائی مہارت سے بیٹنگ کر رہا ہے۔

محمد یوسف کی اس ننھے کھلاڑی سے ملاقات کی وڈیو پر مختلف ٹویپس نے تبصرے بھی کیے ہیں۔

انور کہتے ہیں کہ ’عبداللہ شفیق کی طرح مضبوط ڈیفنس لگ رہا ہے۔‘

کرکٹر عامر یامین نے لکھا کہ ’بہت اچھے یوسف بھائی، نوجوان کھلاڑیوں کے لیے حوصلہ افزائی ہے۔‘

محمد یوسف سے ملاقات وغیرہ پر تبصرہ کرتے ہوئے اسد عزیز لکھتے ہیں کہ ’یہ کتنا خوش نصیب ہے۔‘