آپریشن ابھی جاری ہے، تفصیلی بریفنگ بعد میں دی جائے گی: انڈین ایئر فورس

انڈیا کی ائیر فورس نے دعویٰ کیا ہے کہ انہوں نے ’آپریشن سندور‘ کے طے شدہ تمام اہداف پیشہ ورانہ اور درست طریقے سے کامیابی کے ساتھ حاصل کر لیے ہیں۔

انڈین ائیر فورس (آئی اے ایف) نے اتوار کو ایکس پر ایک پوسٹ میں کہا کہ ’ایئر فورس نے قومی اہداف کے لیے پورے شعور اور سمجھ داری سے کارروائیاں کی ہیں۔‘

بیان میں مزید کہا گیا کہ ’چونکہ آپریشن ابھی جاری ہے، اس لیے مناسب وقت پر تفصیلی بریفنگ دی جائے گی۔‘

’آئی اے ایف تمام افراد کو قیاس آرائیوں اور غیرمصدقہ معلومات پھیلانے کے گریز کی تاکید کرتی ہے۔‘

انڈین ایئرفورس کا یہ بیان ایسے وقت میں سامنے آیا ہے جب ایک دن قبل پاکستان اور انڈیا کے درمیان جنگ بندی پر اتفاق ہوا ہے۔

دونوں ممالک کے درمیان 22 مئی کے پہلگام حملے کے بعد سے جاری کشیدگی میں کمی سنیچر کو اس وقت دیکھی گئی جب امریکی صدر ڈونلڈ ٹرمپ نے جنگ بندی کی خبر اپنے سوشل  میڈیا پلیٹ فارم ‘دی ٹوتھ‘ پر پوسٹ کی۔

جنگ بندی پر اتفاق کی دونوں ممالک کی قیادت نے تصدیق کی تاہم اس کے بعد بھی انڈیا اور پاکستان ایک دوسرے پر سیز فائر کی خلاف ورزی کے الزامات عائد کر رہے ہیں۔