بنگلہ دیش کے خلاف دوسرے اور آخری کرکٹ ٹیسٹ میچ میں پاکستان کے کپتان شان مسعود نے ٹاس جیت کر پہلے فیلڈنگ کرنے کا فیصلہ کیا ہے۔
اس میچ میں پاکستانی ٹیم میں سٹار بلے باز بابر اعظم کی واپسی ہوئی ہے۔
دوسری جانب بنگلہ دیش نے دوسرے اور آخری ٹیسٹ میچ میں اپنے وائٹ بال اوپنر تنزید حسن تمیم کو ٹیسٹ کیپ سونپتے ہوئے ان کا ڈیبیو کرایا ہے۔
میرپور میں کھیلے گئے پہلے ٹیسٹ میچ میں 104 رنز کی شکست کے بعد پاکستان کو سیریز میں 0-1 کی خسارے کا سامنا ہے۔
مزید پڑھیں
دوسرے میچ کے لیے پاکستان نے اوپنر امام الحق کو ڈراپ کر کے بابر اعظم کو ٹیم میں شامل کیا ہے جو گھٹنے کی انجری کے باعث پہلا ٹیسٹ نہیں کھیل سکے تھے۔
پاکستان نے فاسٹ بولر شاہین شاہ آفریدی کی جگہ خرم شہزاد کو فائنل الیون کا حصہ بنایا ہے جبکہ آف سپنر ساجد خان نے نعمان علی کی جگہ لی ہے۔
بنگلہ دیش نے اوپنر شادمان اسلام کے سینے کی تکلیف (جو انہیں میرپور ٹیسٹ کے دوران لاحق ہوئی تھی) کے باعث باہر ہونے پر تنزید حسن کو ٹیسٹ کیپ دی ہے۔
شریف الاسلام بھی نومبر 2024 کے بعد پہلی مرتبہ ٹیسٹ کرکٹ میں واپس آئے ہیں، انہیں عبادات حسین کی جگہ شامل کیا گیا ہے۔ محمود الحسن جوئے، جن کی فٹنس کے حوالے سے میچ سے قبل شکوک و شبہات تھے، اپنی جگہ برقرار رکھنے میں کامیاب رہے ہیں۔
بنگلہ دیش کی پلیئنگ الیون
محمود الحسن جوئے، تنزید حسن، نجم الحسن شانتو (کپتان)، مومن الحق، مشفیق الرحیم، لٹن داس (وکٹ کیپر)، مہدی حسن معراج، تاجل اسلام، تسکین احمد، ناہید رانا، شریف الاسلام۔
پاکستانی پلیئنگ الیون
اذان اویس، عبداللہ فضل، شان مسعود (کپتان)، بابر اعظم، سعود شکیل، محمد رضوان (وکٹ کیپر)، سلمان علی آغا، خرم شہزاد، ساجد خان، حسن علی، محمد عباس۔
