اٹلی کی پولیس نے جنوبی اٹلی میں ایک جلی ہوئی منی وین سے کھیتوں میں کام کرنے والے چار پاکستانی مزدوروں کی لاشیں ملنے کے بعد قتل کے الزام میں دو پاکستانی شہریوں کو گرفتار کر لیا ہے۔
خبر رساں ایجنسی ’اے ایف پی‘ کے مطابق اطالوی اخبار ’کوریئرے ڈیلا سیرا‘ نے رپورٹ کیا ہے کہ جلی ہوئی گاڑی صوبہ کلابریا کے وسیع زرعی علاقے میں واقع گاؤں امینڈولارا کے قریب ایک پیٹرول پمپ سے برآمد ہوئی۔
مزید پڑھیں
رپورٹ کے مطابق پیٹرول پمپ کی سی سی ٹی وی فوٹیج میں دو افراد کو منی وین کے دروازے باہر سے بند کرتے اور گاڑی کے اندر کوئی لیکوڈ شئے چھڑکتے ہوئے دیکھا گیا۔
فوٹیج میں بعد ازاں گاڑی میں آگ بھڑکتے اور دونوں افراد کو موقع سے فرار ہوتے ہوئے بھی دیکھا جا سکتا ہے۔
خبر کے مطابق فائر فائٹرز نے آگ بجھانے کے بعد گاڑی کے اندر سے چار افراد کی لاشیں برآمد کیں۔
مقامی پولیس چیف انتونیو بوریلی کے مطابق ’یہ یقینی طور پر قتل کا واقعہ ہے، اب صرف اس کے تمام پہلوؤں کا تعین کرنا باقی ہے۔‘
اخبار نے مزید رپورٹ کیا کہ ’گزشتہ چند ماہ کے دوران اس علاقے میں پاکستانیوں کو لے جانے والی گاڑیوں اور منی وینز کو نذرِ آتش کیے جانے کے 14 واقعات پیش آ چکے ہیں۔‘
Il video dei pakistani bruciati vivi nell'auto ad Amendolara, in due bloccano le portiere https://t.co/Yye0LBjtp8
— Corriere della Sera (@Corriere) June 2, 2026
رپورٹ کے مطابق اس زرعی خطے میں کھیتوں میں کام، رہائشی دستاویزات اور رہائش کی سہولیات کی تقسیم پر مختلف تارکینِ وطن گروہوں کے درمیان کشیدگی پائی جاتی ہے، جسے ان واقعات کی ایک ممکنہ وجہ قرار دیا جا رہا ہے۔
