پاکستان کے سابق وزیراعظم عمران خان کو عدالتی حکم پر طبی معائنے کے لیے نجی اسپتال منتقل کیے جانے کے چند گھنٹوں بعد جمعہ کی صبح دوبارہ اڈیالہ جیل منتقل کر دیا گیا۔
وزیر اطلاعات عطا اللہ تارڑ نے ایکس پر لکھا کہ ‘ماہر ڈاکٹروں کی ٹیم نے عمران خان کو طبی لحاظ سے صحت مند قرار دیا، جس کے بعد تمام کارروائی مکمل ہونے پر انہیں دوبارہ اڈیالہ جیل منتقل کر دیا گیا۔‘
خبر رساں ادارے روئٹرز کے پی ٹی آئی کے ایک ترجمان نے بھی تصدیق کی کہ عمران خان کو رات گئے چند گھنٹے ہسپتال میں گزارنے کے بعد دوبارہ جیل منتقل کر دیا گیا۔
73 سالہ عمران خان کو سپریم کورٹ کے اس ہفتے جاری کردہ حکم کے بعد جمعہ کی صبح اسلام آباد کے شفا انٹرنیشنل ہسپتال منتقل کیا گیا تھا، جہاں ان کا طبی معائنہ کیا گیا۔
پی ٹی آئی کے ترجمان نے بتایا کہ سابق وزیراعظم کو معائنے کے بعد راولپنڈی میں واقع اڈیالہ جیل واپس منتقل کر دیا گیا ہے۔
عمران خان اگست 2023 سے قید ہیں۔ ان کا کہنا ہے کہ ان کے خلاف قائم مقدمات سیاسی بنیادوں پر بنائے گئے ہیں، تاہم حکومت اس الزام کی تردید کرتی ہے۔
ان کے وکلا کا مؤقف ہے کہ جیل میں ان کی صحت بگڑ گئی ہے اور ان کی دائیں آنکھ کی بینائی نمایاں حد تک متاثر ہوئی ہے۔ دوسری جانب حکومت کا کہنا ہے کہ طبی رپورٹس میں ایسی کوئی کیفیت سامنے نہیں آئی جس کے لیے فوری علاج کی ضرورت ہو۔
سپریم کورٹ نے منگل کو اپنے حکم میں متعلقہ حکام کو ہدایت کی تھی کہ عمران خان کو 48 گھنٹوں کے اندر شفا انٹرنیشنل ہسپتال منتقل کیا جائے اور انہیں ایسے میڈیکل بورڈ تک رسائی دی جائے جس میں ان کے ذاتی معالج بھی شامل ہوں۔
