’اطراف مختلف مگر دل اور جذبات ایک جیسے‘، اداکارہ شہناز گِل پاکستان انڈیا بارڈر پر

انڈین اداکارہ و گلوکارہ شہناز گِل نے لاہور سے متصل واہگہ بارڈر کی دوسری طرف یعنی اٹاری سرحد کا دورہ کیا، جہاں انہوں نے دونوں ممالک کے عوام کے درمیان مشترکہ جذبات اور باہمی محبت کا پیغام دیا۔

شہناز گِل نے انسٹاگرام پر اٹاری سرحد کے دورے کی ویڈیو شیئر کرتے ہوئے لکھا کہ ’سرحد پر کھڑے ہو کر بھی کوئی فرق محسوس نہیں ہوا، اطراف مختلف ہیں لیکن دل اور جذبات ایک جیسے ہیں۔‘

ویڈیو میں شہناز گِل اپنے ساتھی اداکار گپی گریوال کے ہمراہ سرحد پر ہونے والی پریڈ اور پرچم اتارنے کی تقریب دیکھتی نظر آئیں، جبکہ انہوں نے وہاں موجود ہجوم کے ساتھ انڈیا کے حق میں نعرے بھی لگائے۔

اداکارہ نے سرحدی سکیورٹی فورس کے اہلکاروں کے ساتھ تصاویر بھی بنوائیں۔

شہناز گِل کی اس پوسٹ میں انڈین اور پاکستانی پرچم کے نشان بھی شامل ہیں جبکہ ان کے پیغام نے سوشل میڈیا صارفین کی توجہ حاصل کی۔

بعض صارفین نے ان کے پیغام کو سرحدوں سے بالاتر ہو کر مشترکہ انسانیت اور جذبات کی عکاسی قرار دیا۔

شہناز گِل اور گپی گریوال نے واہگہ سرحد کا یہ دورہ اپنی نئی پنجابی فلم ’سنگھ ورسز کور 2‘ کی تشہیری مہم کے سلسلے میں کیا۔

فلم میں دونوں مرکزی کردار ادا کر رہے ہیں جبکہ یہ فلم 11 ستمبر کو دنیا بھر میں ریلیز ہونے والی ہے۔

شہناز گِل کی جانب سے سرحد پر دیا گیا یہ پیغام ایسے وقت میں سامنے آیا ہے جب دونوں ملکوں کے درمیان سیاسی اور سفارتی اختلافات برقرار ہیں، تاہم اداکارہ نے اپنے پیغام میں اختلافات کے بجائے دونوں جانب کے لوگوں کے مشترکہ جذبات کو اجاگر کیا۔