’وہ غصے میں تھے‘، فرید ایاز کے قوالی چھوڑنے کے اعلان پر بھائی ابو محمد کی وضاحت

معروف پاکستانی قوال فرید ایاز کی جانب سے قوالی سے ریٹائرمنٹ کے اعلان کی ویڈیو وائرل ہونے کے بعد ان کے بھائی ابو محمد نے وضاحت کی ہے کہ وہ قوالی نہیں چھوڑ رہے ’بلکہ غصے میں تھے۔‘

پاکستانی انگریزی اخبار ڈان کے شعبہِ ثقافت و شوبز ’امیجز‘ کے مطابق 76 سالہ فرید ایاز نے جمعے کو کراچی میں ایک تقریب کے دوران سٹیج پر موجود سامعین سے خطاب کرتے ہوئے قوالی سے ریٹائرمنٹ کا اعلان کیا تھا۔

وائرل ویڈیو میں فرید ایاز کو کہتے سنا جا سکتا ہے کہ ’خواتین و حضرات، یہاں سے جاتے جاتے صرف یہ کہنا چاہتا ہوں کہ آج میں قوالی سے ریٹائرمنٹ کا اعلان کر رہا ہوں۔‘

اس اعلان پر تقریب میں موجود افراد نے حیرت کا اظہار کیا۔ 

فرید ایاز نے مزید کہا کہ وہ طویل عرصے سے اپنے سامعین کی خدمت کرتے آرہے ہیں اور اب نئی نسل اس روایت کو آگے بڑھائے گی۔

اس کے بعد وہ سٹیج سے چلے گئے تو حاضرین نے تالیاں بجائیں۔

تاہم منگل  کو فرید ایاز کے بھائی ابو محمد نے ’امیجز‘ سے گفتگو کرتے ہوئے کہا کہ ’فرید ایاز قوالی سے ریٹائر نہیں ہو رہے بلکہ وہ غصے میں تھے۔‘ تاہم انہوں نے یہ نہیں بتایا کہ فرید ایاز کس بات پر ناراض تھے۔

فرید ایاز اور ابو محمد ایک قوالی گروپ کی قیادت کرتے ہیں۔ دونوں بھائی فلمی گانوں اور میوزک شو ’کوک سٹوڈیو‘ میں پیش کیے گئے کلام ’پیا گھر آیا‘ کے باعث بھی پہچانے جاتے ہیں۔

فرید ایاز کا تعلق معروف ’قوال بچہ گھرانے‘ سے ہے، جس کی روایت 700 سال سے زیادہ پرانی بتائی جاتی ہے۔ اس گھرانے کو شاعر امیر خسرو سے منسوب کیا جاتا ہے، جنہیں برصغیر میں قوالی کی روایت کے فروغ سے جوڑا جاتا ہے۔

فرید ایاز کی ریٹائرمنٹ کی خبر سامنے آنے کے بعد ان کے مداحوں میں تشویش پائی جا رہی تھی، تاہم ان کے بھائی کی وضاحت سے واضح ہوا کہ قوالی چھوڑنے کا اعلان ان کی ریٹائرمنٹ کا حتمی فیصلہ نہیں تھا۔

رپورٹ کے مطابق فرید ایاز اور ابو محمد کے امریکہ کے دورے کے تحت اگلے ماہ تک پرفارمنسز بھی شیڈول تھیں، جس کی وجہ سے ان کی ریٹائرمنٹ کی خبر پر سوالات اٹھے تھے۔ تاہم ان پروگراموں میں شرکت کے حوالے سے اس خبر میں کوئی الگ تصدیق نہیں دی گئی۔