پھل وزن کم کرنے میں مددگار
بڑھا ہوا وزن کم کرنے کے لئے لوگ لاکھوں جتن کرتے ہیں ۔ کبھی ڈائٹنگ ، کبھی ورزش اورکبھی جم کے چکر لگاتے نظر آتے ہیں ۔ عام طور پر افراد میں یہ غلط فہمی پائی جاتی ہے کہ وزن کم کرنے کے لئے پھلوں سے اجتناب کرنا چاہیے ۔ پھلوں میں موجود مٹھاس یا گلوکوز موٹاپے میں اضافے کا باعث بنتے ہیں تاہم حقیقت یہ ہے کہ پھلوں میں ایسے قدرتی اجزا پائے جاتے ہیں جو وزن گھٹانے کے ساتھ ساتھ آپ کو صحت مند رکھنے میں مدد دیتے ہیں ۔
معلومات اور تحقیقات سے یہ بات ثابت ہوتی ہے کہ اسٹرابیری نہ صرف آپ کی گلوکوز کی ضروریات کو پورا کرتی ہے بلکہ وزن کم کرنے میں بھی معاون ثابت ہوتی ہے ۔ اسی طرح اگر آپ قدرتی طریقے سے بنا نقصان اپنے جسم سے زائد چربی کم کرنا چاہتی ہیں تو اس کے لئے چکوترے کا استعمال سب سے بہترین ہے ۔ چکوترے کے اندر پانی وافر مقدار میں پایا جاتا ہے ۔ چکوترا کھانے سے آپ نہ صرف اپنی بھوک مٹا سکتی ہیں بلکہ ایک کم کیلوریز والی غذا کو اپنے جسم کا حصہ بنا سکتی ہیں ۔
ناشپاتی کے اندر چربی کے اجزا انتہائی کم ہوتے ہیں ۔ ایک پھل کے اندر بیس گرام چکنائی پائی جاتی ہیں جو آپ کا جسم آسانی سے استعمال کر لیتا ہے ۔ یہ جسم کے میٹابولک سسٹم کو فعال بناتا ہے اور جسم کے افعال کو درست بناتا ہے ۔ ناشپاتی کا استعمال آپ کے وزن کو کم کرکے آپ کے اندر مثبت تبدیلی لاتا ہے ۔ ناشپاتی کی طرح رس بھری بھی وزن کو کم کرنے میں مدد دیتی ہے ۔ رس بھری کے اندر خصوصی مادہ کیٹون پایا جاتا ہے جو قدرتی طور پر کیلوریز کو جلانے کا کام کرتا ہے ۔ رس بھری کے مستقل استعمال سے کافی حد تک وزن کم کیا جا سکتا ہے ۔ مجموعی طور پر صحت کو بہتر بنانے میں بھی یہ پھل اہم کردار ادا کرتا ہے اور جسم سے زائد چربی زائل کرکے آپ کو دلکش اور جاذب نظر بناتا ہے ۔
