Sorry, you need to enable JavaScript to visit this website.

وکٹ ملنے پر گراؤنڈ میں دوڑتے دوڑتے شاہنواز دھانی اولمپکس کا سوچنے لگے

وکٹ ملنے پر گراؤنڈ میں شاہنواز دھانی کی دوڑ کو خاصی دلچسپی سے دیکھا جاتا ہے (فوٹو: پی ایس ایل)
پاکستان سپر لیگ سیزن سیون میں اپنی بولنگ سے زیادہ اپنے دلچسپ انداز کی وجہ سے کرکٹ فینز کی توجہ کا مرکز رہنے والے شاہنواز دہانی ’پیرس میں 400 میٹر کی دوڑ میں حصہ لینے کا سوچنے‘ لگے ہیں۔
پی ایس ایل 7 میں اب تک سب سے بہتر کارکردگی کا مظاہرہ کرنے والی ٹیم ملتان سلطانز کا حصہ شاہنواز دہانی نے سنیچر کو ایک ٹویٹ میں لکھا کہ وہ پیرس اولپکس میں حصہ لینے سے متعلق سوچ رہے ہیں۔
پاکستانی ایتھلیٹ عبدالمعید بلوچ اور اولپمکس کے آفیشنل ہینڈل کو مینشن کرتے ہوئے شاہنواز دہانی نے جہاں اپنا خیال پیش کیا وہیں ایھتلیٹ سے ان کی رائے جاننے کی بھی کوشش کی۔
’بلوچ بولٹ‘ کے لقب سے معروف سندھ سے تعلق رکھنے والے عبدالمعید بلوچ سیف گیمز میں پاکستان کی نمائندگی کر چکے ہیں۔ جب کہ بین الصوبائی قائداعظم گیمز میں وہ دوڑ کے مقابلوں میں کئی میڈلز اپنے نام کر چکے ہیں۔

شاہنواز دہانی کی جانب سے یہ منفرد خیال اس وقت سامنے آیا جب کوئٹہ گلیڈی ایٹرز کے خلاف میچ میں ان کی بولنگ کے دوران کی ایک ویڈیو وائرل ہوئی ہے۔
جمعہ کو ہونے والے میچ میں شاہنواز دہانی نے وکٹ حاصل کرنے کے بعد اپنے مخصوص انداز میں باؤنڈری کی طرف دوڑ لگائی تو بیٹنگ کے لیے گراؤنڈ میں آتے ہوئے گلیڈی ایٹرز کے کھلاڑی نسیم شاہ نے بلا دکھا کر انہیں روکنے کی کوشش کی۔
ٹیم ڈگ میں موجود لیجنڈ کرکٹر ویوین رچرڈ نے شاہنواز دھانی کے دلچسپ انداز پر جواب میں ان کی ستائش کی۔ 
اگلی ہی گیند پر شاہنواز دھانی نے نسیم شاہ کو آؤٹ کیا تو ایک مرتبہ پھر وہ باؤنڈری کی جانب دوڑے۔ اس موقع پر انہیں گراؤنڈ میں موجود امپائر علیم ڈار نے پکڑ کر روکنے کی کوشش کی لیکن شاہنواز دھانی نے جہاں خود کو ان سے بچایا وہیں دوڑتے ہوئے اپنے مقام پر پہنچ ہی گئے۔
مختلف صارفین نے ملتان سلطانز کے کرکٹر کی جانب سے گراؤنڈ میں اپنائے گئے دلچسپ انداز پر گفتگو کی تو وہ خود بھی اس کا حصہ بنے اور ’پیرس اولپکس میں دوڑنے‘ کی خواہش کا اظہار کیا۔
شاہنواز دھانی گراؤند میں اپنے دلچسپ انداز کی وجہ سے ہی شائقین کی توجہ کا مرکز نہیں بلکہ وہ اب تک ٹورنامنٹ میں اپنی ٹیم کی جانب سے کھیلے گئے آٹھ میچوں میں 12  وکٹیں بھی حاصل کر چکے ہیں۔
دائیں ہاتھ سے بولنگ کرنے والے 23 سالہ شاہنواز دہانی نے کوئٹہ گلیڈی ایٹرز کے خلاف میچ میں 22 رنز کر دو کھلاڑیوں کو آؤٹ کیا تھا۔

شیئر: