عدالتی فیصلے کے جائزے تک پی ٹی آئی ارکان کے اسمبلی اجلاس میں شرکت پر پابندی

سپیکر قومی اسمبلی راجہ پرویز اشرف نے کہا ہے کہ پاکستان تحریک انصاف کے ارکان پارلیمنٹ ہاؤس کی عمارت میں آ سکتے ہیں لیکن لاہور ہائی کورٹ کا فیصلہ موصول ہونے اور اس پر مشاورت تک کسی بھی رکن کو قومی اسمبلی ایوان میں داخل نہیں ہونے دیا جائے گا۔ 

دوسری جانب پاکستان تحریک انصاف (پی ٹی آئی) ارکان کے پارلیمنٹ ہاؤس میں پہنچنے کے بعد قومی اسمبلی کا آج جمعرات کو ہونے والا اجلاس مختصر کارروائی کے بعد غیر معینہ مدت کے لیے ملتوی کر دیا گیا ہے۔  

اجلاس شروع ہونے سے قبل سپیکر نے قومی اسمبلی کے سکیورٹی حکام کو ہدایات جاری کر دی ہیں۔ سپیکر نے سارجنٹ ایٹ آرمز کو ہدایات جاری کرتے ہوئے کہا کہ پی ٹی آئی کے سابق ارکانِ اسمبلی کو ایوان میں نہ آنے دیا جائے۔ 

پارلیمنٹ حکام نے اردو نیوز کو بتایا کہ سپیکر نے ہدایت کی ہے کہ پی ٹی آئی ارکان سے متعلق معاملے پر جب تک وضاحت نہ ہو جائے تو وہ ایوان کے اندرداخل نہیں ہو سکتے۔

’جو شخص قومی اسمبلی کا رکن نہیں وہ ایوان میں ارکان کی نشستوں پر بیٹھ سکتا ہے نہ ہی ایوان کے فلور پر قدم رکھ سکتا ہے۔ کسی سابق رکن نے بغیر اجازت جانے کی کوشش کی توسارجنٹ ایٹ آرمز اسے روکیں گے۔ اس حوالے سے حکمت عملی طے کر لی گئی ہے۔‘ 

پی ٹی آئی کے استعفوں کے حوالے سے ہونے والی حالیہ پیش رفت پر سپیکر قومی اسمبلی راجہ پرویز اشرف نے اپنے ایک ویڈیو بیان میں کہا کہ لاہور ہائی کورٹ کا فیصلہ ابھی تک اسمبلی کو موصول نہیں ہوا، آئندہ کا لائحہ عمل فیصلہ پڑھنے کہ بعد طے کیا جائے گا۔ 

دوسری جانب پی ٹی آئی کے 43 ارکان کے استعفوں کی منظوری معطل ہونے کے بعد انہیں پارٹی کی جانب سے پارلیمنٹ ہاؤس پہنچنے کی ہدایات جاری کی گئی تھیں جس پر تحریک انصاف کے ارکان اپوزیشن لیڈر کے چیمبر میں پہنچنا شروع ہو گئے ہیں۔  

ہدایات ملنے کے بعد ڈی نوٹیفائی ہونے والے پی ٹی آئی ارکان اسمبلی شنیلہ روتھ، ساجدہ بیگم، فوزیہ بہرام، رخسانہ نوید، عاصمہ عدید ، نصرت واحد، نفیسہ خٹک  اور رائے محمد مرتضیٰ اقبال پارلیمنٹ ہاؤس میں اپوزیشن لیڈر سینیٹر شہزاد وسیم کے چیمبر میں پہنچ گئے ہیں۔

جبکہ پی ٹی آئی ارکان کی بھی اپنے اپنے علاقوں سے وفاقی دارالحکومت اسلام آباد آمد کا سلسلہ شروع ہو گیا ہے۔

تحریک انصاف کے 43 ارکان کو سینیٹ میں اپوزیشن لیڈر شہزاد وسیم کے چیمبر میں پہنچنے کی ہدایت کی گئی ہے۔ 

سپیکر نے حکومتی رہنماؤں اور ماہرین کا بھی اہم اجلاس طلب کر لیا ہے پی ٹی آئی ارکان کا معاملہ بھر زیر غور آئے گا اور ہائی کورٹ کے فیصلے کا جائزہ لیا جائزہ گا۔

پی ٹی آئی ارکان بھی عدالت کے تحریری حکم کے منتظر تھے کہ ڈپٹی سپیکر زاہد اکرم درانی کی زیر صدارت اجلاس شروع ہوا اور مختصر کارروائی کے بعد غیر معینہ مدت تک کے لیے ملتوی کر دیا گیا۔