سابق وزیراعظم اور بانی پاکستان تحریک انصاف (پی ٹی آئی) عمران خان نے توشہ خانہ ٹو کیس میں سزا کے بعد احتجاج کی کال دیتے ہوئے کہا ہے کہ ’سہیل آفریدی کو پیغام دیتا ہوں کہ سٹریٹ موومنٹ کی تیاری پکڑیں۔‘
سنیچر کو توشہ خانہ کیس ٹو میں سزا سنائے جانے کے بعد ان کے ایکس اکاؤنٹ پر شائع کیے گئے بیان میں عمران خان کا کہنا تھا کہ ’سہیل آفریدی کو پیغام دیتا ہوں کہ سٹریٹ موومنٹ کی تیاری پکڑیں، پوری قوم کو اپنے حقوق کے لیے اٹھنا ہو گا۔‘
بیان میں کہا گیا ہے کہ ’یہاں صرف لکھے لکھائے فیصلے سنائے جا رہے ہیں۔ پچھلے تین سال کے بےبنیاد فیصلوں اور سزاؤں کی طرح توشہ خانہ 2 کا فیصلہ بھی میرے لیے کوئی نئی بات نہیں۔ یہ فیصلہ بھی جج نے بغیر کسی ثبوت اور قانونی تقاضے پورے کیے بغیر ہی جلدبازی میں سنا دیا- ہمیں یا ہمارے وکلأ تک کو نہیں سنا گیا۔‘
