انڈیا: ایوارڈ شو میں اداکار راجپال یادو کے قرض کا تذکرہ اور سلمان خان کی انٹری

انڈیا میں ایک ایوارڈ شو کے دوران پیش آنے والا ایک لمحہ سوشل میڈیا پر اس وقت تیزی سے وائرل ہو گیا جب انڈین اداکار راجپال یادو کے بارے میں کیے گئے ایک تبصرے نے صارفین کی توجہ حاصل کر لی اور شدید ردِعمل سامنے آیا۔

یہ واقعہ سکرین ایوارڈز 2026 کے دوران پیش آیا، جو ممبئی میں منعقد ہوا تھا۔

بالی وڈ کی اس تقریب میں کئی معروف شخصیات شریک تھیں اور اس کی میزبانی متعدد افراد کر رہے تھے، جن میں مشہور صحافی سوربھ دویویدی بھی شامل تھے۔

سٹیج کے ایک حصے میں چلنے والی ویڈیو میں دکھایا گیا کہ سوربھ دویویدی نے راجپال یادو کے مبینہ مالی کیس سے متعلق ایک جملہ کہا۔ انہوں نے کہا کہ ’راج پال بھائی، ڈالر اوپر نیچے ہوتا رہے، آپ کو اتنے ہی پیسے واپس کرنا پڑیں گے جتنے ادھار ہیں۔‘

اس تبصرے کے بعد راجپال یادو کچھ لمحوں کے لیے خاموش رہے، پھر مسکراتے ہوئے جواب دیا کہ ’مسئلہ تو سن لو ایک بار، میں تو مسئلہ ہی سنانا چاہتا ہوں۔‘

واقعے کے فوراً بعد یہ ویڈیو سوشل میڈیا پر تیزی سے وائرل ہو گئی، جہاں صارفین نے اس پر مختلف ردِعمل دیا اور کمنٹس میں اپنی رائے کا اظہار کیا۔

بالی وڈ سٹار سلمان خان نے راجپال یادو کی فوٹو شیئر کرتے ہوئے لکھا کہ ’راج پال بھائی، آپ 30 سال سے کام کر رہے ہیں اور ہم سب نے آپ کو بار بار دہرایا ہے کیونکہ آپ اپنے کام کو اچھی طرح جانتے ہیں اور ایک خاص قدر (ویلیو) لے کر آتے ہیں۔ آپ کو کام بہت ملے گا اور اسی ڈالر ریٹ پر ملے گا اور ملتا رہے گا، یہی حقیقت ہے۔‘

انہوں نے مزید لکھا کہ ’اور یہ یاد رکھیں کہ کبھی کبھی بہاؤ میں کچھ بات نکل جاتی ہے۔ اگر دینا ہی ہے تو دماغ میں رکھیں، دل سے کام کریں۔ ڈالر اوپر ہو یا نیچے، کیا فرق پڑتا ہے، دینا تو انڈیا میں ہی ہے۔‘

اس کے جواب میں راجپال یادو نے لکھا کہ ’بھائی، میرے 30 سال کے سفر کو سراہنے کے لیے بہت بہت شکریہ۔ آپ ہمیشہ ایک بڑے بھائی کی طرح راستہ دکھاتے آئے ہیں۔ آپ سے محبت ہے بھائی، سلام۔‘