وزیراعظم شہباز شریف دورہ قطر پر دوحہ پہنچ گئے

پاکستان کے وزیر اعظم شہباز شریف اپنے سرکاری دورے پر قطر پہنچ گئے ہیں جہاں وہ امیر قطر سے دوطرفہ تعلقات اور خطے کی صورتحال پر بات چیت کریں گے۔

 وزیراعظم آفس کے مطابق وزیرِ اعظم جمعرات کو دوحہ پہنچے جہاں ان کا استقبال سلطان بن سعد المریخی نے کیا۔ اس موقع پر قطری مسلح افواج کے دستے نے انھیں سلامی بھی پیش کی جبکہ دوحہ ایئرپورٹ اور شہر کے مختلف مقامات کو پاکستانی پرچموں سے سجایا گیا تھا۔

دورے کے دوران وزیر اعظم کی شیخ تمیم بن حمد آل ثانی سے ملاقات متوقع ہے جس میں دوطرفہ تعلقات، سرمایہ کاری اور خطے و عالمی امن کے امور پر تبادلۂ خیال کیا جائے گا۔

اس وفد میں نائب وزیر اعظم و وزیر خارجہ اسحاق ڈار، وزیرِ اطلاعات عطاء اللہ تارڑ، معاونِ خصوصی طارق فاطمی اور بین الاقوامی میڈیا کے لیے وزیرِ اعظم کے ترجمان مشرف زیدی بھی شامل ہیں۔

اس سے قبل وزیر اعظم نے سعودی عرب کا دورہ کیا تھا جہاں وہ مدینہ منورہ گئے اور مسجد نبوی میں حاضری دی۔ اس موقع پر انھوں نے پاکستان اور عالم اسلام کے لیے دعا کی اور روضۂ رسول پر حاضری بھی دی۔

تجزیہ کاروں کے مطابق وزیرِ اعظم کے سعودی عرب اور قطر کے حالیہ دورے خلیجی ممالک کے ساتھ پاکستان کے تعلقات کو مزید مضبوط بنانے کی کوششوں کا حصہ ہیں جہاں توانائی، سرمایہ کاری اور افرادی قوت کے شعبوں میں تعاون کو فروغ دینے پر توجہ دی جا رہی ہے۔