سلمان خان کی نئی وائرل تصاویر پر مداح تشویش میں مبتلا، ’وہ بیمار لگ رہے ہیں‘

بالی وُڈ کے سپرسٹار اداکار سلمان خان ایک حالیہ عوامی تقریب میں شرکت کے بعد توجہ کا مرکز ہیں۔ سوشل میڈیا پر صارفین کے درمیان ان کی صحت سے متعلق مختلف قیاس آرائیاں گردش کر رہی ہیں۔

انڈین میڈیا کے مطابق اداکار کی تازہ تصاویر اور ویڈیوز وائرل ہونے کے بعد متعدد مداحوں نے ان کی بدلی ہوئی شخصیت اور ظاہری شکل پر حیرانی کا اظہار کیا ہے۔

سلمان خان نے جمعے کو ممبئی میں ’سلم ری ہیبیلیٹیشن اتھارٹی’ (ایس آر اے) کے زیراہتمام منعقد ہونے والی ایک تقریب میں شرکت کی، جہاں انہوں نے اتھارٹی کے نئے ڈیٹا کلیکشن اینڈ ویریفیکیشن سپورٹ سینٹر (آئی ٹی سرور روم) کا افتتاح کیا۔

تقریب کے دوران انہوں نے 50 سے زائد مستحق خاندانوں میں مستقل رہائش کے گھروں کی چابیاں بھی تقسیم کیں۔

اداکار نے اتھارٹی کے حکام سے ملاقات کی، جاری منصوبوں پر بریفنگ لی اور جدید ٹیکنالوجی کے ذریعے کچی آبادیوں کی بحالی کے اقدامات کو سراہا۔

تاہم تقریب کے بعد سوشل میڈیا پر سلمان خان کی تصاویر اور ویڈیوز نے ایک نئی بحث چھیڑ دی ہے۔ مداحوں نے محسوس کیا ہے کہ 60 سال کے اداکار کی ظاہری شکل ان کی حالیہ عوامی تقریبات کے مقابلے میں خاصی مختلف دکھائی دے رہی ہے۔ ہلکے زیتونی رنگ کی قمیض اور کلین شیو لُک میں نظر آنے والے سلمان خان کو دیکھ کر کئی صارفین نے ان کی صحت کے بارے میں خدشات کا اظہار کیا۔

سوشل میڈیا پر ایک صارف نے لکھا کہ ’سلمان خان بیمار لگ رہے ہیں، اللہ انہیں صحت دے۔‘ ایک اور مداح نے تبصرہ کیا کہ ’میرا ہیرو بوڑھا ہو رہا ہے۔‘ جبکہ ایک صارف نے سوال کیا کہ ’بھائی کو کیا ہو گیا؟‘ کئی مداحوں نے بڑھتی عمر کے اثرات پر بھی افسوس کا اظہار کیا۔

تقریب کے دوران سلمان خان خوش گوار موڈ میں دکھائی دیے اور صحافیوں سے بھی ہلکے پھلکے انداز میں گفتگو کی۔ میڈیا سے بات کرتے ہوئے انہوں نے مسکراتے ہوئے کہا کہ ’مجھ سے کچھ بھی پوچھ لیں، بس وہ ایک سوال نہ کریں، اسے پوچھنے کا کوئی فائدہ نہیں۔‘ ان کا اشارہ اپنی آئندہ فلم ’ماتروبھومی: مے وار ریسٹ اِن پیس‘ کی جانب تھا، جس کی ریلیز میں تاخیر کے باعث حالیہ دنوں میں خبریں سامنے آرہی ہیں۔

کام کے محاذ پر سلمان خان حال ہی میں ’راجا شیواجی‘ میں جیوا مہالا کے مختصر کردار میں نظر آئے تھے، جبکہ ان کی اگلی فلم ’ماتروبھومی: مے وار ریسٹ اِن پیس‘ ہے، جس کی ہدایت کاری اپوروا لاکھیا نے کی ہے۔ فلم میں چترانگدا سنگھ، مکیش رشی اور انکور بھاٹیہ بھی اہم کردار ادا کر رہے ہیں۔