بیوٹی انفلوئنسرعبیر سندر نے اپنے سعودی فالورز کو کیا پیغام دیا؟

سعودی بیوٹی انٹرپرینیور اور کانٹینٹ کری ایٹر عبیر سندر نے سعودی ہوائی اڈوں پر حالیہ حملوں کے بعد مملکت کی حمایت کے ایک پیغام میں سعودی شہریوں پرزور دے کر کہا ہے کہ وہ اپنے حوصلے بلند رکھیں اور اپنی زندگیوں سے لطف اندوز ہوتے رہیں۔

عرب نیوز کے مطابق انسٹاگرام پر شیئر کی گئی ایک پوسٹ میں بالوں کی دیکھ بھال کے برانڈ ایس این ڈی آر کی بانی نے کہا کہ ان کے بہت سے فالورز نے پوچھا تھا کہ انہوں نے اس بحران کے بارے میں بات کیوں نہیں کی۔

انہوں نے لکھا کہ ’صرف اس لیے کہ میں محسوس نہیں کرتی کہ میری زندگی کسی بحران میں ہے۔ میں اپنا دن معمول کے مطابق گزار رہی ہوں، اور میں اپنے ارد گرد زندگی کو جاری دیکھتی ہوں، اور یہ خود ایک ایسی نعمت ہے جس پر میں اللہ کا شکر ادا کرتی ہوں۔‘

’ہم ایک ایسے ملک میں ہیں جو ہماری عزت کرتا ہے، ایک ایسی قیادت کے ساتھ جو ہماری فکر کرتی ہے اور ایسے مردوں کے ساتھ جو ہماری سلامتی کے ذمہ دار ہیں۔ ان پر ہمارا اعتماد کسی بھی دھمکی سے بڑا ہے، اور ہم میں خوف پیدا کرنے کی کسی بھی کوشش سے زیادہ مضبوط ہے۔‘

انہوں نے لکھا کہ ’ہم سعودی عرب میں ہیں، اور سعودی ڈرتے نہیں ہیں۔ ہم توجہ دیتے ہیں اور سرکاری ہدایات پر عمل کرتے ہیں، لیکن ہم افواہوں، مبالغہ آرائی اور آن لائن بوٹس کو اپنی زندگیوں پر کنٹرول کرنے کی اجازت نہیں دیتے ہیں۔‘

’جو کوئی ہمارے وطن کی سلامتی کو دھمکانے کی کوشش کرتا ہے اسے ہمارے صبر کو کمزوری یا ہمارے سکون کو لاپرواہی نہیں سمجھنا چاہیے۔‘

انہوں نے سعودی شہریوں سے براہ راست بھی خطاب کیا۔

انہوں نے لکھا کہ ’ سعودی شہریوں، اپنے حوصلے بلند رکھو، اپنی زندگی جیو اور اس سے لطف اندوز ہو، اور اپنی خبریں سرکاری ذرائع سے لو۔ آپ ایک ایسے وطن میں ہیں جو آپ کا احترام کرتا ہے اور آپ کے وقار کو محفوظ رکھتا ہے، اور آپ کو اس میں خوش رہنے اور پرسکون محسوس کرنے کا پورا حق ہے۔‘

’اللہ سعودی عرب، اس کی قیادت، اس کے عوام اور اس کی سرزمین پر رہنے والے ہر شخص کی حفاظت فرمائے۔ ہمارے وطن پر ہمارے فخر کو باتوں سے نہیں ہلايا جا سکتا، اور اس پر ہمارے اعتماد کو دھمکیوں سے نہیں توڑا جا سکتا۔‘

ان کے یہ تبصرے اس وقت سامنے آئے ہیں جب یمن کی حوثی ملیشیا نے سعودی ہوائی اڈوں پر میزائل اور ڈرون حملوں میں تیزی لائی ہے، جن میں ریاض کا کنگ خالد انٹرنیشنل ایئرپورٹ بھی شامل ہے، جہاں 10 اکتوبر کو ہونے والے ایک حملے میں 13 افراد ہلاک اور 300 سے زائد زخمی ہوئے تھے۔

سندر ان دیگر عوامی شخصیات میں شامل ہو گئی ہیں جنہوں نے حالیہ دنوں میں مملکت کے لیے اپنی حمایت کا اظہار کیا ہے۔

سعودی بیوٹی انٹرپرینیور یارا النملہ نے کہا کہ ’ہمارا وطن ہماری رگوں میں دوڑتا ہے،‘ جبکہ سعودی ڈیزائنر العنود بدر نے سعودی عرب کو ’ایک ایسی مضبوط سرزمین قرار دیا جسے بحرانوں سے شکست نہیں دی جا سکتی اور نہ ہی جھوٹ سے تقسیم کیا جا سکتا ہے۔‘

سندر نے 2018 میں بالوں کی مصنوعات کے لیے ایک آن لائن بوتیک ایس این ڈی آر کا آغاز کیا تھا۔ 2023 میں انہوں نے خواتین کے عالمی دن کے موقع پر دیگر سعودی تخلیق کاروں کے ساتھ ایم اے سی کاسمیٹکس کی ایک مہم میں حصہ لیا تھا۔