کراچی..اسٹیٹ بینک آف پاکستان پیر کو 10 روپے مالیت کا نیا سکہ جاری کرے گا جس کی منظوری وفاقی حکومت پہلے ہی دے چکی ہے۔ نیا سکہ زرد رنگ کا ہے اس کا وزن 5.50 گرام اور قطر 25.5ملی میٹر ہے۔سکے کے ایک جانب روایتی ہلال اور ستارہ موجود ہے جبکہ چاند اور تارے کے اوپر’ ’اسلامی جمہوریہ پاکستان“ اردو میں درج ہے چاند کے نیچے اور گندم کی دو ڈالیوں کے درمیان سکے کے جاری ہونے کا سال درج ہے۔سکے کے دوسرے رخ پر شاہ فیصل مسجد کی تصویر کو کندہ کیا گیا ہے اس کے اوپر فاختائیں اڑتی دکھائی دے رہی ہیں۔مسجد کے عکس کے نیچے واضح الفاظ میں 10 کا ہندسہ درج ہے۔ سکے کے نچلے جانب اردو میں ”10 روپیہ‘ ‘لکھا گیا ہے۔ ملکی تاریخ میں یہ پہلی مرتبہ ہوگا کہ حکومت 10 روپے مالیت کے سکے جاری کریگی۔ اس سے قبل 10 روپے کے یادگاری سکے جاری کئے جاچکے ہیں۔ حکومت نے آخری مرتبہ چین کی 60 ویں یوم آزادی کے موقع پر اکتوبر 2009 ءمیں اظہار یکجہتی کےلئے 10 روپے مالیت کے یادگاری سکے جاری کئے تھے۔ اسی طرح بے نظیر بھٹو کی پہلی برسی، 2003 ءمیں فاطمہ جناح کی 110 ویں سالگرہ اور پاکستانی سینیٹ کے 25 سال مکمل ہونے پر اگست 1998 ءمیں 10 روپے کے یادگاری سکے جاری ہوئے۔
پاکستان میں 10روپے کا نیا سکہ
