ابھا میں لطیف نظاروں کا حامل تفریحی مقام ، ’ نجمہ و نھر‘
ابھا میں لطیف نظاروں کا حامل تفریحی مقام ، ’ نجمہ و نھر‘
جمعرات 31 جولائی 2025 20:30
غروب آفتاب سے قبل گہری دھند علاقے کو اپنی آغوش میں لے لیتی ہے(فوٹو، ایکس اکاونٹ)
ابھا شہر کے جنوبی پہاڑی سلسلے میں نھران پہاڑ کی چوٹی پر واقع ’نجمہ و نھر‘ نامی تفریح گاہ عسیر ریجن کے خوبصورت قدرتی مقامات میں ایک منفرد تفریحی مقام ہے۔
جو فطرت کے حسن سے لطف اندوز ہونے والوں کے لیے ایک مثالی جگہ مانی جانی ہے۔
اخبار 24 کے مطابق مذکورہ تفریحی مقام وادی ابھا کے بند کے بالکل سامنے واقع ہے جہاں حد نگاہ تک خوبصورت نظارے پھیلے ہوئے ہیں ۔
قدرتی نظاروں کے حسن میں اس وقت مزید اضافہ ہوجاتا ہے جب غروب آفتاب سے کچھ دیر قبل گہری دھند علاقے کو اپنی آغوش میں لے لیتی ہے ۔
یہ موقعہ فوٹو گرافی اور نظاروں سے لطف اندوز ہونے والوں کے لیے انتہائی خوبصورت اور منفرد منظر پیش کرتا ہے۔
پہاڑی کی چوٹی جو کہ بادلوں کو چومتی دکھائی دیتی ہے فطری حسن کے دلدادہ افراد کے لیے انتہائی خوبصورت مناظر ہوتے ہیں جو زائرین کے لیے ایک منفرد تجربہ پیش کرتے ہیں۔
میونسپلٹی کی جانب سے تفریحی سرگرمیوں کا بھی اہتمام کیا گیا (فوٹو، ایکس اکاونٹ)
عسیر میونسپلٹی کی جانب سے قدرتی نظاروں سے لطف اندوز ہونے والوں کے لیے علاقے میں ترقیاتی امور پر خصوصی طورپر توجہ دی گئی ہے جس کے تحت وہاں مختلف ثقافتی و علاقائی سرگرمیاں بھی منعقد کی جاتی ہیں علاوہ ازیں کافی شاپس اور اشیائے خورونوش کی دکانیں بھی وہاں موجود ہیں۔
