نئی دہلی۔۔۔۔۔۔ قومی دارالحکومت اور این سی آر میں اتوار کی شام سے فضائی آلودگی میں جو اضافہ ہوا تھا وہ پیر کو بھی مزید بڑھتا گیا جس کے نتیجے میں معمولات زندگی ایک بار پھر درہم برہم ہوگئے۔ پیر کو حالانکہ تعلیمی ادارے کھلے لیکن ٹریفک کے ساتھ ساتھ ریلوے سروس بھی متاثر ہوگئی۔ دھند گہری ہونے کے باعث محکمہ ریلوے نے 10 ٹرینوں کو منسوخ کردیا جبکہ 17 ٹرینوں کو تاخیر سے چلنے پر مجبور ہونا پڑا۔ یہی نہیں بلکہ محکمہ ریلوے نے2ٹرینوں کو ری شیڈول کردیا کیونکہ حد نگاہ مسلسل کم ہوتی جارہی تھی۔ محکمہ موسمیا ت کے مطابق نئی دہلی اور اس کے مضافات میں حد نگاہ 1200 میٹر تک آگئی۔ اس بات کا امکان ہے کہ اس میں مزید کمی ہوگی۔ محکمہ موسمیات کے ترجمان نے یہ بھی بتایا کہ ایئر کوالٹی مسلسل خراب ہورہی ہے جو 289 پر پی ایم 10 اور 177 پر پی ایم 2.5 ریکارڈ کی گئی۔ یہی نہیں بلکہ کم سے کم درجہ حرارت 8.2 ڈگری درج کیاگیا۔ ترجمان نے یہ بھی بتایا کہ پیر کی شام ہلکی پھلکی بارش ہونے کا امکان ہے جس سے کم ازکم حد نگاہ مزید بہتر ہوسکتی ہے۔ انہوں ے یہ بھی بتایا کہ پیر کو رطوبت کی سطح صبح ساڑھے 8 بجے 92 فیصد تھی ۔ واضح رہے کہ اتوار کی شام جب فضائی آلودگی بڑھنے لگی تو دھند کی کثافت کو دیکھتے ہوئے محکمہ ریلوے نے 19 ٹرینوں کو منسوخ کردیا تھا۔ پیر کو 10 ٹرینیں منسوخ کی گئیں اس طرح 2 دنوں میں 29 ٹرینوں کو منسوخ کرنا پڑا۔ ترجمان نے بتایا کہ دھند میں اضافہ ہوتا جارہا ہے اور شام کے وقت صورتحال انتہائی خراب ہوجاتی ہے۔
