جدہ.... گورنر مکہ مکرمہ اور سربراہ مرکزی حج کمیٹی شہزادہ خالد الفیصل نے واضح کیا ہے کہ خادم حرمین شریفین شاہ سلمان بن عبدالعزیز اور ولی عہد شہزادہ محمد بن سلمان مشاعر مقدسہ اور مکہ مکرمہ کو جدید خطوط پر استوار کرکے ہی دم لیں گے۔ شاہ سلمان نے اس عزم کا اظہار مکہ مکرمہ اور مشاعر مقدسہ ڈیولپمنٹ رائل اتھارٹی کے قیام کا فیصلہ کرکے کردیا۔ وہ بدھ کو ” حج عبادت اور تہذیب“ کے زیر عنوان حج آگہی مہم کے 11ویں ایڈیشن کے افتتاح کے موقع پر سعودی ذرائع ابلاغ کے نمائندوں سے گفتگو کررہے تھے۔ انہوں نے کہاکہ رائل اتھارٹی کے پہلے اجلاس میںشرکت کے بعد میں پورے وثوق سے یہ بات کہہ سکتا ہوں کہ آئندہ برسوں کے دوران مکہ مکرمہ اور مشاعر مقدسہ کا مستقبل نہایت امید افزا ہے۔ نئے انداز اور نئے طریقوں نیز نئے عزم کے ساتھ زائرین کے لئے تمام سہولتو ںکی فراہمی کا انتظام ہوگا۔ انہوں نے کہا کہ جب سے مجھے مکہ مکرمہ ریجن کی خدمت کا اعزاز نصیب ہوا ہے تب سے ہر سال حج انتظامات پر نظر رکھے ہوئے ہوں ۔ تمام حج ادارے عازمین کی خدمت جس انداز سے کررہے ہیں اس سے انکی حب الوطنی ، اسلامی فریضے کی ادائیگی سے گہری وابستگی اور انسانیت نوازی منعکس ہوتی ہے۔ خالدالفیصل نے بتایا کہ 31 جولائی 2018ءتک ہوائی اڈوں، بندرگاہوں اور بری سرحدی چوکیوں سے 558ہزار عازمین ارض مقدس پہنچ چکے ہیں۔سب سے زیادہ انڈونیشی عازمین آئے ہیں انکی تعداد ایک لاکھ3ہزار ہے۔ ہند سے 93ہزار، پاکستان سے 82ہزار ، ترکی سے 45ہزار اورعراق سے 12ہزار سے زیادہ ضیوف الرحمن پہنچ چکے ہیں۔ ابھی تک قطر سے کوئی بھی عازم حج نہیں آیا۔ خالد الفیصل نے کہا کہ سعودی عرب کی تصویر کو مسخ کرنے کیلئے چلائی جانے والی میڈیا مہم کا واحد جواب ضیوف الرحمن کو پیش کی جانے والی خدمات ہیں۔ خالد الفیصل نے حج عبادت اورتہذیب آگہی مہم کے سرپرست اداروں کو اعزاز عطا کئے۔ 30سرکاری اور نجی ادارے اس مہم میں شریک ہیں۔
