پاکستان نے ایک بار پھر اپنے اس موقف کا اعادہ کیا ہے کہ وہ انڈیا کے ساتھ کشمیر، دہشت گردی اور تجارت سمیت تمام معاملات پر بات چیت کے لیے ہر وقت تیار ہے۔
پاکستان کے دفتر خارجہ کے ترجمان ڈاکٹر محمد فیصل نے ’اردو نیوز‘ سے بات چیت کرتے ہوئے کہا ہے کہ وزیر اعظم پاکستان شنگھائی تعاون تظیم کے اجلاس کے دوران انڈیا کے وزیر اعظم مودی سے ملاقات کے لیے تیار ہیں۔
عمران خان کی جانب سے انڈیا کے وزیر اعظم کو خط لکھنے کی تصدیق کرتے ہوئے ان کا کہنا تھا عمران خان نے نریندر مودی کو لکھے گئے خط میں تمام مسائل کو بات چیت کے ذریعے حل کرنے کے پاکستان کے اصولی موقف کا اعادہ کیا ہے۔
ان کا کہنا تھا کہ وزیر اعظم عمران خان کئی مرتبہ انڈیا کو پیشکش کرچکے ہیں کہ وہ اگر تعلقات میں بہتری کے لیے ایک قدم اٹھائیں گے تو پاکستان دو قدم اٹھائے گا۔
وزیر اعظم کی پیشکش کے جواب کے حوالے سے پوچھے گئے سوال کے جواب میں ڈاکٹر فیصل کا کہنا تھا کہ یہ تو انڈیا ہی بتا سکتا ہے کہ آیا وہ پاکستان کے ساتھ مسائل کے حل کے لیے بات چیت کے لیے تیار ہے یا نہیں۔
اس ماہ کے دوران شنگھائی تعاون تنظیم کے سربراہ اجلاس کے موقعے پر عمران خان اور مودی کے درمیان بات چیت کے حوالے سے پوچھے گئے سوال کے جواب میں دفتر خارجہ کے ترجمان کا کہنا تھا کہ وزیراعظم پاکستان مودی کے ساتھ کہیں بھی اور کسی بھی فورم پر ملاقات اور بات چیت کے لیے تیار ہیں۔
خیال رہے عمران خان نے وزیراعظم بننے کے بعد نریندر مودی کو دوسری مرتبہ امن مذاکرات کی پیشکش کی ہے۔ انہوں نے اپنے حالیہ خط میں مودی کو ایک بار پھر وزیر اعظم بننے اور انتخابات میں بھارتیہ جنتا پارٹی (بی جے پی) کی کامیابی پر مبارک باد بھی دی ہے۔
اپنے خط میں وزیراعظم نے اس بات پر زور دیا کہ دونوں ممالک کو اپنے اختلافات دور کرنے چاہئیں جبکہ اس سے قبل لکھے گئے خط میں انہوں نے بھارت کے مطالبے پر دہشت گردی کے مسئلے پر بات چیت کرنے کے لیے رضا مندی کا اظہار کیا تھا۔
وزیراعظم نے اپنے خط میں پاکستان کی پڑوسی ممالک کے ساتھ امن کی پالیسی اور جنوبی ایشیا میں پائیدار امن کے لیے مسئلہ کشمیر سمیت تمام تنازعات کے حل کے لیے کام کرنے کے عزم کا بھی اظہار کیا۔
اس کے علاوہ وزیراعظم نے اپنے خط میں باہمی احترام اور بھروسے کے ساتھ غربت اور دونوں ممالک کے عوام کو درپیش دیگر مسائل کا سامنا کرنے کے لیے مل کر کام کرنے کی ضرورت پر زور دیا۔
خیال رہے کہ بھارتیہ جنتا پارٹی کی لوک سبھا انتخابات میں جیت کے اعلان کے فوراً بعد عمران خان نے مودی کو ٹویٹ کے ذریعے بھی مبارک باد دی تھی۔ گذشتہ مہینے عمران خان نے مودی کو فون بھی کیا تھا اور انتخابات میں جیت کی مبارکباد دے دی تھی۔
سوشل میڈیا پر عمران خان کی طرف سے مودی کو مذاکرات کی ایک بار پھر پیشکش کیے جانے پر ملے جلے ردعمل کا اظہار کیا جا رہا ہے۔
پاکستان میں حزب اختلاف کی سب سے بڑی جماعت مسلم لیگ نواز کے جنرل سیکرٹری اور سابق وزیر داخلہ احسن اقبال نے عمران کی جانب سے مذاکرات کی پیشکش پر تنقید کرتے ہوئے اسے مودی کے سامنے بچھ جانے سے تعبیر کیا ہے۔
احسن اقبال نے ٹویٹ کیا کہ ’نواز شریف کے پاس بھارتی وزیر اعظم مودی خود چل کے آئے تو مودی کا یار کے فتوٰی اور ہمارے 'غیرتمند' وزیراعظم اب بھارتی وزیر اعظم مودی کے آگے بچھے جا رہے ہیں تو وہ امن کے سفیر! کیا بات ہے-‘
