ورلڈ کپ: پاکستان نے ویسٹ انڈیز کو ہرا دیا

پاکستان نے ویمن ٹی 20 کرکٹ ورلڈ کپ  کے اپنے پہلے میچ میں ویسٹ انڈیز کو آٹھ وکٹوں سے شکست دے دی۔

آسٹریلیا کے دارالحکومت کینبرا کے منوگا اوول سٹیڈیم میں کھیلے گئے میچ میں ویسٹ انڈیز نے پہلے بیٹنگ کرتے ہوئے مقررہ 20 اوورز میں 7 وکٹوں کے نقصان پر 124 رنز بنائے۔

جواب میں پاکستان ویمن ٹیم نے مطلوبہ ہدف 19 ویں اوور کی دوسری گیند پر حاصل کر لیا۔ 

پاکستانی اوپنر جویریہ خان نے 28 گیندوں پر 32 جب کہ منیبہ علی نے 26 گیندوں پر 25 رنز بنائے۔

کپتان بسمہ معروف 38 جبکہ ندا ڈار 18 رنز پر ناٹ آؤٹ رہیں۔

ویسٹ انڈیز کی جانب سے ایفی فلیچر اور سٹیفنی ٹیلر نے ایک، ایک وکٹ حاصل کی۔

 قبل ازیں ٹاس جیت کر  ویسٹ انڈیز نے پہلے بیٹنگ کرتے ہوئے سات وکٹوں کے نقصان پر 124 رنز بنائے۔

پاکستان کی جانب سے ڈیانا بیگ، ندا ڈار اور ایمن انور نے دو دو کھلاڑیوں کو آؤٹ کیا۔

پاکستانی ٹیم نے ویسٹ انڈیز کے خلاف آخری میچز اپنے ہوم گراؤنڈ پر کھیلے تھے۔ گذشتہ برس جنوری اور فروی میں کیے گئے دورہ پاکستان/امارات میں ویسٹ انڈین وومن ٹیم نے ایک میچ جیتا تھا، ایک میچ پاکستان کے نام رہا تھا جب کہ ایک میچ برابر رہا تھا۔

ویمن ٹی ٹوئنٹی ورلڈ کپ

ویمن ٹی ٹوئنٹی ورلڈ کپ خواتین کی مختصر فارمیٹ کی کرکٹ کا ٹورنامنٹ ہے جو ہر دو برس بعد منعقد کیا جاتا ہے۔ 10 ٹیموں کے ساتھ کھیلا جانے والا موجودہ ٹی ٹوئنٹی ورلڈ کپ اس سلسلے کا ساتواں ایڈیشن ہے جو آسٹریلیا میں منعقد کیا جا رہا ہے۔

ویمن ٹی ٹوئنٹی ورلڈ کپ 2020 میں شرکت کرنے والی 10 ٹیموں کو پانچ، پانچ کے دو گروپس میں تقسیم کیا گیا ہے۔2009 میں انگلینڈ سے شروع ہونے والے ویمن ٹی ٹوئنٹی ورلڈ کپ میں سب سے زیادہ چار مرتبہ آسٹریلوی ٹیم فاتح رہی ہے۔

• کھیل کی خبریں واٹس ایپ پر حاصل کرنے کے لیے ”اردو نیوز سپورٹس“ گروپ جوائن کریں