بین ڈنک کی شاندار بیٹنگ، لاہور کی فتح

لاہور قلندرز نے بین ڈنک کی دھواں دھار بیٹنگ کی بدولت پاکستان سپر لیگ کے اہم  میچ میں کراچی کنگز کو آٹھ وکٹوں سے شکست دے دی۔

 یہ پی ایس ایل میں لاہور قلندرز کی تیسری فتح ہے۔

قلندرز کی جانب سے بین ڈنک نے 40 گیندوں پر 99 رنز بنائے اور ناٹ آؤٹ رہے۔ ان کی اننگز میں 12 چھکے اور تین چوکے شامل تھے۔

بین ڈنک کو شاندار کارکردگی پر مین آف دے میچ قرار دے دیا گیا۔

لاہور کے کپتان سہیل اختر نے 46 گیندوں پر ناقابل شکست 68 رنز بنائے۔ 

کنگز کی جانب سے محمد عامر اور عمر خان نے ایک ایک وکٹ حاصل کی۔

اس سے قبل کراچی کنگز نے لاہور قلندرز کو جیت کے لیے 188 رنز کا ہدف دیا تھا۔

قلندرز کو پہلا نقصان فخر زمان کی صورت میں اٹھانا پڑا۔ وہ بغیر کوئی رنز بنائے محمد عامر کی گیند پر بولڈ ہوئے۔

محمد حفیظ 16 رنز بنا کر عمر خان کی گیند پر کیمرون ڈیلپورٹ کو کیچ تھما بیٹھے۔

اس سے قبل کنگز کی جانب سے ایلکس ہیلز نے شاندار 80 رنز ناٹ آؤٹ سکور کیے۔ ان کی 48 گیندوں پر مشتمل اننگز میں پانچ چھکے اور چھ چوکے شامل تھے.

چیڈوک والٹن نے 20 گیندوں پر 45 رنز کی اننگز کھیلی۔ وہ پانچ چھکے اور دو چوکے لگانے میں کامیاب ہوئے۔

کراچی کنگز کو اننگز کے ابتدا ہی میں اس وقت نقصان اٹھانا پڑا جب شرجیل خان صرف پانچ رنز بنانے کے بعد رن آؤٹ ہو گئے۔

اس کے بعد بابر اعظم کا ساتھ دینے ایلکس ہیلز آئے اور دونوں نے 60 رنز کی شراکت قائم کرکے سکور کو 70 تک پہنچا دیا۔ بابر 38 رنز بنانے کے بعد معاذ خان کا شکار بنے۔

بابر اعظم معاذ خان کی گیند پر سہیل اختر کو کیچ تھما بیٹھے۔

کیمرون ڈیلپورٹ معاذ خان کا دوسرا شکار بنے۔ وہ 15 رنز بنا کر معاذ خان کی گیند پر کیچ آؤٹ ہوئے۔

 

افتخار احمد ایک رنز بنا کر رن آؤٹ ہوئے۔

قلندرز کی جانب سے معاذ خان نے دو اور سلمان ارشاد نے ایک وکٹ حاصل کی۔

اس سے قبل لاہور کے کپتان سہیل اختر نے ٹاس جیت کر کراچی کنگز کو پہلے بیٹنگ کی دعوت دی.

خیال ہے لاہور قلندرز رواں ایونٹ میں اب تک تین میچ ہی جیت پائے ہیں اور ان میں سے دو فتوحات دفاعی چیمپئن کوئٹہ گلیڈی ایٹرز کے خلاف ہیں.

لاہور قلندرز چھ پوائنٹس کے ساتھ پوائنٹس ٹیبل پر پانچویں نمبر پر ہے۔ جب کہ کراچی کنگز کی ٹیم پوئنٹس ٹیبل پر چوتھی پوزیشن پر براجمان ہے۔

 کراچی کنگز کے سات میچوں کے بعد سات پوائنٹس ہیں۔

پوائنٹس ٹیبل پر ملتان سلطانز سات میچوں کے بعد 11 پوائنٹس کے ساتھ سرفہرست ہے جب کہ پشاور زلمی آٹھ میچوں کے بعد نو پوائنٹس کے ساتھ دوسرے نمبر پر ہے۔

ملتان سلطانز اتوار کو اسلام آباد یونائیٹد کو ہرا کر پلے آف کے مرحلے کے لیے کوالیفائی کرنے والی پہلی ٹیم بن گئی ہے۔

کوئٹہ گلیڈی ایٹرز آٹھ میچوں کے بعد آٹھ پوائنٹس کے ساتھ آخری پوزیشن پر ہے۔