نرخوں میں اضافے پر چالان

سعودی وزارت تجارت کے قیمتوں پر قابو پانے والے یونٹ نے مختلف شہروں میں گزشتہ تیرہ دنوں میں گراں فروشی کرنے والوں کے خلاف چار ہزار سے زائد چالان کیے ہیں۔

 ویب نیوز’سبق‘ نے وزارت تجارت کے ذرائع کے حوالے سے بتایا ہے کہ موجودہ صورتحال کو دیکھتے ہوئے وزارت تجارت نے تاجروں کو سختی سے ہدایت کی تھی کہ اشیائے خورونوش اور دیگر ضروری چیزوں کے نرخوں میں غیر معمولی اضافہ نہ کیا جائے۔

وزارت تجارت کی جانب سے تاجروں کو تحریری طورپر بھی انتباہ کیا گیا تھا کہ نرخوں میں اضافہ کرنے والوں کے خلاف کارروائی کی جائے گی۔

وزارت کے پرائس کنٹرول یونٹ نے ملک کے مختلف شہروں میں 23 مارچ سے 4 اپریل تک 51 ہزار دورے کیے۔

 اشیائے خورونوش کے علاوہ سینیٹائزز اور میڈیکل ماسک اور دیگر اشیا کے نرخوں کا معائنہ کیا گیا۔

تفتیشی ٹیم کا کہنا تھا کہ مارکیٹوں میں پھل اور سبزی کے نرخوں میں 54 فیصد اضافہ ریکارڈ کیا گیا۔ ماسک اور سینیٹائزر کے نرخوں میں بیس فیصد جبکہ انڈوں کی قیمتوں میں چار فیصد اضافہ دیکھنےمیں آیا تھا۔

تفتیشی ٹیموں نے اضافہ کرنے والوں کے خلاف فوری کارروائی کرتے ہوئے موقع پر ہی چالان کیے۔

قانون کے مطابق گراں فروشوں کے خلاف تادیبی کارروائی میں ان کی سالانہ فروخت کے مطابق 10 فیصد جرمانہ عائد کیا جاتا ہے۔

خلاف ورزی متعدد بار کیے جانے کی صورت میں 10 ملین ریال تک جرمانہ کیا جا سکتا ہے جبکہ دکان یا سٹور کی سی آر(کمرشل رجسٹریشن) بھی منسوخ کر دی جاتی ہے۔

وزارت تجارت کی جانب سے کہا گیا ہے کہ صارفین بھی قیمتوں پر نظر رکھیں تاکہ گراں فروشی کرنے والوں کا سدباب کیا جاسکے۔

اس ضمن میں وزارت تجارت کی جانب سے ٹول فری نمبر1900 بھی جاری کیا گیا ہے جبکہ وزرات کی ویب سائٹhttps://mci.gov.sa/C-app پر اطلاع دی جا سکتی ہے۔

واضح رہے کورونا وائرس کے حوالے سے بعض ناجائز منافع خور اشیا کی قیمتوں میں غیر معمولی اضافہ کر دیتے ہیں جس کی وجہ سے صارفین کو شدید دشواری کا سامنا ہوتا ہے۔