Sorry, you need to enable JavaScript to visit this website.

انڈین فاسٹ بولر بُمرا کی نئی اننگز، ٹی وی میزبان سے شادی

سچن ٹنڈولکر اور ہربھجن سنگھ نے بھی دونوں کو شادی کی مبارک باد دی (فوٹو: انسٹاگرام سنجنا)
انڈیا کے فاسٹ بولر جسپریت بمرا نے ٹی وی میزبان سنجنا گنیسان سے شادی کر لی ہے اور کرکٹ کی دنیا سمیت مختلف شعبہ زندگی سے وابستہ افراد کی جانب سے نئے شادی شدہ جوڑے کو مبارک بادیں دینے کا سلسلہ جاری ہے۔
انڈین نیوز چینل این ڈی ٹی وی کے مطابق انڈین کرکٹ ٹیم کے کھلاڑیوں نے بُمرا کو مبارک باد دینے کے لیے ٹویٹس کی ہیں اور ان کی انسٹاگرام پوسٹ پر کمنٹس بھی کیے ہیں۔
انڈین کرکٹ بورڈ اور بُمرا کی انڈین پریمیئر لیگ کی فرینچائز ’ممبئی انڈینز‘ نے بھی جوڑے کو مبارک باد دیتے ہوئے لکھا کہ ’اس خوب صورت سفر کے آغاز پر مبارک باد۔ آپ دونوں کے لیے خوش گوار زندگی کی نیک خواہشات۔‘
شیکھر دھون نے انسٹاگرام پر کمنٹ کرتے ہوئے لکھا کہ ’آپ دونوں کو شادی کی مبارک باد۔‘ چاہل نے لکھا کہ ’آپ دونوں کو مبارک ہو۔‘
’مببئی انڈینز‘ نے ٹویٹ میں لکھا کہ ’بُمرا کو سنجنا نے بولڈ کردیا۔ آپ کے لیے پیار بھری زندگی کی نیک خواہشات۔‘
ہردیک پانڈیا، ان کے بھائی کرونال اور شریاس نے بھی بمرا اور سنجنا کے لیے نیک  تمناؤں کا اظہار کیا۔

اس کے علاوہ سچن ٹنڈولکر اور ہربھجن سنگھ نے بھی دونوں کو شادی کی مبارک باد دی۔
انڈین کرکٹ بورڈ نے انگلینڈ کے خلاف انٹرنیشنل ٹی 20 سیریز سے قبل جسپریت بمرا کو شادی کے لیے چھٹیاں دی تھیں۔

شیئر: