سری لنکا میں کاغذ کی قلت، ہزاروں سکولوں کے سالانہ امتحانات منسوخ

سری لنکا میں پرنٹنگ پیپر نہ ہونے کے باعث ہزاروں سکولوں کےامتحانات منسوخ  کر دے گئے ہیں۔

فرانسیسی خبر رساں ادارے اے ایف پی نے سنیچر کو سری لنکا کے حکام کے حوالے سے بتایا ہے سر ی لنکا کے پاس درآمدات کے لیے ڈالرز کی کمی کی وجہ سے یہ مسئلہ پیدا ہوا۔

شعبہ تعلیم کے حکام کا کہنا ہے کہ وہ امتحانات جو پیر کو شروع ہونا تھے، انہیں منسوخ کر دیا گیا ہے۔

سری لنکا کے مغربی صوبے کے ایجوکیشن ڈپارٹمنٹ کا کہنا ہے کہ ’سکولوں کے پرنسپل امتحانات نہیں لے پا رہے کیونکہ چھاپہ خانے ضروری کاغذ اور سیاہی درآمد کرنے کے لیے زرمبادلہ کی کمی کا شکار ہیں۔‘

حکام کے مطابق پرنٹنگ کے کاغذ کی قلت کی وجہ سے ملک بھر کے 45 لاکھ طلبہ میں دو تہائی متاثر ہوں گے۔

واضح رہے کہ سری لنکا سنگین معاشی مسائل کا سامنا کر رہا ہے اور اس کے پاس زرمبادلہ کے ذخائر نہ ہونے کے برابر ہیں، جس کی وجہ سے ملک کے لیے کھانے پینے کی بنیادی اشیا، ایندھن اور دوائیوں جیسی اشیا کا حصول ایک چیلنج بن گیا ہے۔

پیسوں کی کمی کے شکار سری لنکا نے رواں ہفتے اعلان کیا تھا کہ وہ بدترین معاشی بحران سے نکلنے کے لیے آئی ایم ایف کا بیل آؤٹ پیکج لے گا۔

دوسری جانب آئی ایم ایف نے جمعے کو تصدیق کی ہے کہ وہ سری لنکن صدر کی بیل آؤٹ پیکج کی درخواست پر غور کرنے کے لیے تیار ہیں۔

خیال رہے کہ سری لنکا نے رواں برس چین سے کہا تھا کہ وہ قرضے ادا کرنے میں اس کی مدد کرے لیکن چین کی جانب سے اس کا کوئی باقاعدہ جواب نہیں دیا گیا۔