سعودی عرب کی طرف سے بین الاقوامی اسلامی یونیورسٹی اسلام آباد کے کے لیے بسوں کا تحفہ

بین الاقوامی اسلامی یونیورسٹی اسلام آباد کو سعودی عرب کی جانب سے بسوں کا تحفہ دیا گیا۔

بین الاقوامی اسلامی یونیورسٹی کی جانب سے بدھ کو جاری اعلامیے کے مطابق پاکستان میں سعودی سفیر نواف سعید المالکی نے یونیورسٹی کے نئے کیمپس میں منعقدہ ایک پروقار تقریب کے دوران سعودی حکومت کی طرف سے دی گئی بسیں جامعہ کے حوالے کیں۔

اس موقع پر سفیر نواف سعید المالکی نے کہا کہ پاکستان اور سعودی عرب کے درمیان برادرانہ تعلقات مثالی اور دنیا بھر میں تسلیم کیے جاتے ہیں جب کہ بین الاقوامی اسلامی یونیورسٹی کا سعودی حکومت کے دل میں ایک خاص مقام ہے۔ 

انہوں نے مہمان نوازی پر صدر  جامعہ اور یونیورسٹی انتظامیہ کا شکریہ ادا کیا۔

 صدر بین الاقوامی اسلامی یونیورسٹی پروفیسر ڈاکٹر احمد سعد الاحمد نے بسوں کے اس  تحفے پر سعودی عرب کی حکومت  اور سعودی سفیر کا شکریہ ادا کیا۔ 

انہوں نے کہا کہ اس طرح کے تعاون سے دو طرفہ تعلقات مزید مضبوط ہوتے ہیں جبکہ یونیورسٹی میں طلبا اور عملے کو سہولت فراہم کرنے میں مزید  مدد ملے گی۔

 اس سے قبل سفیر نواف سعید المالکی کو سینٹرل ٹرانسپورٹ یونٹ کے ڈائریکٹر سید حسن آفتاب نے جامعہ کی ٹرانسپورٹ سہولیات کے بارے میں بریفنگ دی۔

 تقریب میں جامعہ کے نائب صدور،  جامعہ میں سعودی فیکلٹی ممبران اور یونیورسٹی کے اعلیٰ حکام نے بھی شرکت کی۔