سعودی عرب کی ترقی پاکستان کے لیے فخر ہے، وزیرِ داخلہ محسن نقوی

پاکستان کے وفاقی وزیر داخلہ محسن نقوی نے سعودی عرب کے قومی دن پر شاہ سلمان بن عبدالعزیز، ولی عہد محمد بن سلمان، شاہی خاندان اور سعودی عوام کو مبارکباد دی ہے۔

منگل کو وزارت داخلہ کی جانب سے جاری بیان میں وزیر داخلہ محسن نقوی نے کہا کہ ’سعودی قیادت، سعودی سفیر اور عوام کے لیے خیر سگالی اور نیک خواہشات کا اظہار کرتا ہوں۔‘ 

انہوں نے کہا کہ ولی عہد محمد بن سلمان کی  ولولہ انگیز قیادت میں سعودی عرب نے ترقی کے سنگ میل عبور کیے ہیں۔ ’سعودی عرب کی ترقی پاکستان کے لیے فخر اور حوصلے کا باعث ہے۔‘

محسن نقوی نے کہا کہ پاکستان سعودی دفاعی تعاون معاہدے نے تاریخی تعلقات کو نئی جہت دی ہے۔ ’دفاعی، اقتصادی اور ثقافتی شراکت داری نے باہمی تعلقات کو نئی بلندیوں تک پہنچایا  ہے۔‘

انہوں نے مزید کہا کہ اسلام اور مسلمانوں کی خدمت کے لیے سعودی عرب کے شاہی خاندان کی خدمات کو فراموش نہیں کیا جا سکتا۔ ’پاکستان سعودی تعلقات دو بھائیوں کی وہ مقدس میراث ہے جو دلوں کی گہرائیوں سے جڑی ہوئی ہے۔‘

وزیر داخلہ نے کہا کہ ’ایک دوسرے کے لیے قربانی، وفا اور خلوص کے رشتے نے اس دوستی کو ہر آزمائش میں سرخرو کیا ہے۔ پاکستان اور سعودی عرب کا روحانی و ثقافتی تعلق جغرافیے سے ماورا ہے۔‘

ان کا کہنا تھا کہ سعودی حکومت نے ہر موقع پر پاکستان کے ساتھ بے لوث دوستی کا ثبوت دیا ہے، چاہے قدرتی آفات ہوں یا عالمی چیلنجز۔ ’پاکستان اور سعودی عرب کے مابین گہرے اور دیرینہ تعلقات ہمیشہ قائم و دائم رہیں گے۔‘

انہوں نے کہا کہ ’پاکستانی قوم سعودی عرب کی سلامتی، استحکام اور خوشحالی کے لیے دل کی گہرائیوں سے دعاگو ہے۔‘